Bas Múftı Nur-Múbarak stýdentterimen kezdesti
Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Almatydaǵy Nur-Múbarak ýnıversıtetine arnaıy kelip, birqatar is-sharaǵa qatysty.
Aldymen Bas múftı bıyl bitirýshi ıslamtanýshylarmen kezdesti. Negizgi maqsat bolashaq túlekterdiń QMDB aıasynda qyzmet etýi jáne olardy jumyspen qamtý máselelerin pysyqtaý boldy. QMDB Tóraǵasy ýnıversıtet ustazdary men stýdentterin Ramazan aıymen quttyqtaı kele, bilim ordasynyń el tarıhyndaǵy mańyzdy ornymen qatar Dinı basqarmanyń osy oqý ornynyń jalǵyz quryltaıshysy ári tikeleı qamqorshysy retinde jaýapkershiligin jiti atqaryp kele jatqanyna toqtaldy. Bolashaq túlekterge óziniń dinge qyzmet jolynyń qalaı bastalǵany jaıly ǵıbratty estelikterimen de bólisti.
«Biz oqý bitirgende «qaıda jumysqa barasyń» dep suramaıtyn. Áli esimde sol kezdegi Bas múftıimiz Ábsattar qajy Derbisáli: «Bári Almaty, Astanada qalǵysy keledi, aýyldaǵy aǵaıynǵa kim qyzmet etedi?» dep, bizge dinge qyzmet jolynda aýyl-aımaqqa joldama berdi. Bas múftıdiń bir aýyz sózimen barlyǵymyz shet óńirlerge baryp, mol tájirıbe jınap, búginde árbirimiz laýazymdy, jaýapty qyzmet atqarýdamyz. Sondyqtan túlekter, ásirese memlekettik bilim grantpen oqyǵandardyń joldama boıynsha qyzmet etýleri elimiz, dinimiz úshin, ózderińiz úshin de óte mańyzdy ári paıdaly» dedi Naýryzbaı qajy Taǵanuly.
Qazirgi ýaqytta ýnıversıtetten keıin ózge salaǵa ketip jatqan túlekter kóbeıgendigine toqtalǵan Bas múftı elimizge joǵary bilimdi ımamdar, ustazdar, azanshylar, teologtar, t.b. din qyzmetkerleriniń qajet ekenin atap ótti. Sondaı-aq stýdenttermen ashyq suhbattasyp, saýaldarǵa jaýap berdi. Jastar da oılaryn ashyq aıtyp, bolashaq áleýmettik qoldaýlar, áskerge barý máselesi, ýaǵyz-nasıhat jumystary, t.b. saýaldaryna naqty jaýap aldy.
Óz kezeginde ýnıversıtet rektory, professor Mýhammad ash-Shahhat bıyl oqý ordasynan 250 túlektiń bitirip shyǵatynyn aıtyp, olarǵa din qyzmetinde sáttilik tiledi. Sondaı-aq búgingi kezdesýge Dinı basqarmanyń aımaqtardaǵy bas ımamdary da arnaıy kelip, óz óńirleriniń bolashaq túlekterimen júzdesip, suhbattasty.
Budan keıin Nur-Múbarak ýnıversıtetine arnaıy zııarat barysynda Bas múftı Naýryzbaı qajy Taǵanuly jańa oqý ǵımaratynyń qurylysymen tanysty. Otandastarymyzdy jańa qurylysqa atsalysýǵa shaqyratyn beınebaıanǵa suhbat berip, jańa ǵımarattyń berekeli bolýyna aq batasyn berdi.
