BAS MÚFTI ORAL ÓŃIRINIŃ IMAMDARYMEN KEZDESTI (FOTO)

QMDB Tóraǵasy, Bas múftı Naýryzbaı qajy Taǵanuly Batys Qazaqstan oblysyna jumys sapary aıasynda óńir ımamdarymen kezdesti.

Bas múftı jıynda din qyzmetkerleri, ımamdar men ustazdardyń asyl dinimizdiń aıbynyn asyrý jolyndaǵy qyzmetine sáttilik tilep, ımamnyń rýhanı jetekshi ekenin alǵa tartty.

“Jamaǵat sizderge uıyp, qulshylyq jasaıdy, sizderdiń sózderińizge qulaq asady. Sondyqtan biz, din qyzmetkerleri, ımamdar men ustazdar, árdaıym rýhanı jetilip otyrýymyz kerek” deı kele Astana qalasynda ótken «Imam – izgi qoǵam jarshysy» taqyrybyndaǵy V respýblıkalyq ımamdar forýmynda din qyzmetkerleriniń jumysyn jetildirý baǵytynda birneshe mańyzdy qujattar qabyldanǵanyn alǵa tartty.

“Allaǵa shúkir, ımamdarymyzdyń dinı jáne ulttyq qundylyqtardy dáriptep, dinı qulshylyqtardy sharıǵat talabyna saı atqaryp keledi. Dinı rásimderdi birizdilikpen ótkizýde de din qyzmetkerleri aýqymdy jumys atqarýda. Alaıda qazirgi zaman aǵymyn alyp qarasaq, búgingi qoǵamnyń betalysyn baǵamdasaq, bul jumystar jetkiliksiz. Qazirgi zamanda ımamdar dinı rásimderdi atqarýshy ǵana emes, qoǵamdy tárbıeleýge úles qosatyn aǵartýshy ustaz bolýy kerek” dedi Naýryzbaı qajy Taǵanuly.