BAS MÚFTI ORAZAǴA ORAI KÁSIPKERLERGE ÚNDEÝ JASADY (FOTO)

Elordada Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly orazaǵa oraı BAQ ókilderiniń qatysýymen ótken baspasóz máslıhatynda kásipkerlerge úndeý jasady. 

«Osy rette kásipker azamattardy, saýda ortalyqtarynyń basshylaryn qasıetti aıdyń qurmeti úshin halqymyzdyń turmys jaǵdaıyn eskerip, áleýmettik mańyzy bar taýarlar men azyq-túlik baǵasyn múmkindiginshe 10 paıyzǵa deıin tómendetip, jeńildik jasaýǵa úndeımin. Jaqsy amaldaryńyz ózderińizge eselep jaqsylyq bolyp qaıtatynynda kúmán joq. Mundaıda halqymyz: «Qaıyrymdylyq jasasań – qaıyryn óziń kóresiń» demeı me?! Paıǵambarymyz Muhammed (oǵan Allanyń salaýaty men sálemi bolsyn): «Kimde-kim baýyrynyń qajetin ótese, Alla onyń qajetinde bolady. Kimde-kim musylmannyń bir qaıǵysyn seıiltse, Alla onyń qaıǵy-qasiretteriniń birin seıiltedi», – degen.

Osy sátti paıdalanyp, barsha qaýymǵa qasıetti Ramazan aıynda araq-sharap ishilmese jáne dúkenderde satylmasa, múmkindiginshe qudaıy astar keshki aýyzashar ýaqytynda ótkizilse degen tilegimdi jetkizemin. Alla Taǵala Ramazannyń qurmeti úshin jasaǵan jaqsy isimizdiń sebebimen barshamyzdy jaqsylyqqa keneltkeı» dedi Naýryzbaı qajy Taǵanuly.

​