BAS MÚFTI PALESTINA PREZIDENTINIŃ KEŃESShISIN QABYLDADY
Búgin Astana qalasyndaǵy múftııat ǵımaratynda Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Palestına Prezıdentiniń din isteri men ıslamdyq qatynastar jónindegi keńesshisi, Palestına Joǵarǵy sot tóraǵasy, Palestına Sharıǵat soty keńesiniń basshysy Mahmud Álhabbash myrzamen eki jaqty kezdesý ótkizdi.
«Qazaqstan musylmandary dinı basqarmasy árqashan Palestına halqynyń jaǵdaıyna alańdaýshylyq bildirip keledi. Biz qasıetti Qudys jerinde qaıǵyly oqıǵa oryn alǵanda Dinı basqarmanyń resmı málimdemesin jarııaladyq. Búkil álemge Palestına halqynyń halyqaralyq kelisimder men rezolıýtsııada bekitilgen tarıhı quqyǵyn qoldaıtyndyǵymyzdy ashyq túrde jarııa ettik.
Sonymen qatar musylman elderiniń din kóshbasshylary men búkil Islam úmbetine úndeý joldadyq. «Bir mezette – bir duǵa» bastamasy aıasynda meshitterimizde Gaza halqy úshin arnaıy duǵa jasaý is-sharasyn ótkizdik. Bul bastamany musylman elderiniń din kóshbasshylary qoldady. Bizdiń bastamamyzǵa qoldaý bildirgen elimizdegi barsha elshilerge taǵy da alǵysymdy bildiremin.
Jýyrda Astana qalasyndaǵy Respýblıkalyq Bas meshitte ótken II Halyqaralyq Quran jarysy kezinde Palestınadan kelgen qarıǵa arnaıy «Kórermen kózaıymy» nomınatsııasyn tabystap, óz tarapymyzdan rýhanı turǵydan qoldaý kórsettik», – dedi Bas múftı Naýryzbaı qajy Taǵanuly.
Óz kezeginde Mahmud Álhabbash myrza Qazaqstan musylmandary dinı basqarmasynyń atqaryp kele jatqan jumystaryna rızashylyǵyn bildirip, múftııattyń dinı kelisim men rýhanı úılesimdi nyǵaıtý tájirıbesin joǵary baǵalaıtynyn atap ótti. Sondaı-aq QMDB-men qalyptasqan yntymaqtastyqty jalǵastyrýǵa yqylas tanytty.
Kezdesý sońynda taraptar qaıyrymdylyq kómek kórsetý maqsatynda QMDB-ǵa qarasty «Zeket jáne qaıyrymdylyq» qorymen Palestınadaǵy resmı qaıyrymdylyq qory arasyndaǵy seriktestik ornatý boıynsha ýaǵdalasty. Sondaı-aq, ortaq baǵyttar jóninde pikir almasyp, aldaǵy ýaqytta ózara baılanystardy damytý múmkindikterin qarastyrýǵa nıet bildirdi.
