Bas múftı qasıetti zulhıjja aıynyń kelýimen quttyqtady
Búgin QR Prezıdent janyndaǵy Ortalyq Kommýnıkatsııalar qyzmetiniń aqparat alańyna shyqqan Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Qazaq elin qasıetti zulhıjja aıynyń kelýimen quttyqtady.
Bas múftı eldegi barsha musylmandy osynaý qasıetti aıda barynsha duǵada bolýdy nasıhattady. Naýryzbaı qajy Taǵanuly osy kúnderi kópke kómektesip, saýapty amaldarǵa septigin tıgizýge shaqyrdy.
«Búgin, kúnderdiń sultany – qasıetti jumada, aılardyń ulyǵy – zulhıjja aıynda halqymyzdyń amandyǵy men elimizdiń ıgiligi úshin jasap jatqan duǵa-tilekterińiz qabyl bolsyn! Ardaqty paıǵambarymyz Muhammed (oǵan Allanyń salaýaty men sálemi bolsyn): «Alla Taǵalanyń quzyrynda osy on kúnde jasalǵan izgi amaldan abzal ári súıkimdi ıgi is joq. Endeshe sol kezde tasbıhty (sýbhanalla), tahmıdty (álhamdý lıllá), tahlıldi (lá ıláha ıllálla), tákbirdi (Allahý akbar) kóbeıtińder» degen. Osy kúnderde oraza ustap, sadaqa berip, naýqastarǵa dári jetkizip, qaraýsyz qalǵan qarttar men jetimderge, kópbalaly otbasylarǵa kómektesýdiń saýaby mol. Shalǵan qurbandyq, bergen sadaqa, jasaǵan árbir ıgi amaldyń saýaby eselenip jazylǵaı», – dedi Dinı basqarma tóraǵasy.
–Rasynda, qasıetti kúnder men aılarda adam balasynyń rııasyz jasaǵan qulshylyǵy men duǵasy qabyl bolady. Allanyń «Ás-Sálám», ıaǵnı amandyq pen «Ásh-Shafı» shıpa berýshi kórkem esimderin ulyqtaı otyryp, dertke shaldyqqandardyń dertine shıpa suraımyz. Qaıtys bolǵandar úshin Alladan – raqym, Paıǵambarymyzdyń shapaǵatyn tileımiz, – dep túıindedi sózin Bas múftı Naýryzbaı qajy Taǵanuly.
