Bas múftı qaza tapqan kenshilerdiń týystaryna kóńil aıtty
QMDB Tóraǵasy, Bas múftı Naýryzbaı qajy Taǵanuly Qaraǵandy oblysynyń «Abaı» shahtasyndaǵy jarylystan qaza tapqan shahterlerdiń jaqyndary men týystaryna kóńil aıtty.
«Qaraǵandy oblysyndaǵy bolǵan qaıǵyly jaǵdaıdy aýyr qabyldadym. «Abaı» shahtasynda bolǵan metan gazynyń jarylýy saldarynan qanshama otbasy qara jamyldy. Jarylys saldarynan qarapaıym jumysshylar – shahterler qaza tapty.
Ózimniń jáne Qazaqstan musylmandary dinı basqarmasy atynan jarylystan dúnıe salǵan azamattardyń týǵan-týystary men jaqyndaryna qaıǵylaryna ortaqtasyp, kóńil aıtamyn. Sondaı-aq jarylystan zardap shekken, jaraqat alǵan azamattardyń tezirek saýyǵyp ketýin tileımin. Jaratqan jar bolsyn!» delingen jedelhatta.
Aıta keteıik, 7 qarasha kúni tańda «Abaı» shahtasynda metan gazy jaryldy. Bul ýaqytta shahtada 64 adam jumys istep jatqan. Onyń 54-i Evakýatsııalandy. Apat saldarynan 6 kenshi qaza taýyp, 2 adam aýyr jaraqat aldy.
