Bas múftı «Qajylyq-2022» ýaǵyzshy ımamdaryna dáris oqydy (FOTO)
Qazaqstan musylmandary dinı basqarmasynyń Ortalyq apparatynda Qajylyq-2022 ýaǵyzshylarynyń biliktiligin arttyrýǵa arnalǵan semınar bastaldy. Oǵan QMDB Tóraǵasy, Bas múftı Naýryzbaı qajy Taǵanuly arnaıy qatysyp, ımamdarǵa dáris oqydy.
«Ýaǵyz aıtýdyń ádebi men ádisnamasy» taqyrybynda dáris oqyǵan Bas múftı qasıetti saparda qajylarǵa ýaǵyz aıtýdyń jóni bólek ekenin tilge tıek etti.
«Allaǵa sansyz madaq, bıyl araǵa eki jyl salyp, pandemııadan aman-esen shyǵyp, musylman qaýymynyń asyǵa kútken qajylyq maýsymyna barýǵa esik ashylyp otyr.
Ózderińizge málim, Dinı basqarma elimizden baratyn otandyq qajylarymyzǵa rýhanı jol kórsetý maqsatynda arnaıy Qajylyq mıssııasyn qolǵa alyp keledi. Mundaǵy maqsat – otandyq qajylarǵa qolaıly jaǵdaı jasaý. Sonymen qatar qajylarǵa sapaly turǵyda ýaǵyz-nasıhat jumystaryn júrgizý.
Bıyl Dinı basqarma 14 qajylyq kompanııasyna arnaıy ýaǵyzshy ımamdardy bólip otyr. Qajylarǵa ýaǵyz aıtyp, qyzmet kórsetýdiń ózi – úlken saýap. Osyndaı ulyq isti elimizdegi kóptegen din qyzmetkeri arasynan Alla Taǵala sizderge atqarýdy násip etip otyr. Sondyqtan saýapty hám jaýapty amalǵa yjdahattylyq tanytýlaryńyzdy suraımyn. Meshitte jamaǵatqa ýaǵyz aıtý bir basqa, al Qaǵbany taýap etip, jer betindegi eń qasıetti mekenge qonaq bolǵan qajylarymyzǵa ýaǵyz aıtýdyń jóni bir bólek. Bul saparǵa elimizden 4 myńǵa jýyq adam barǵaly otyr. Solardyń báriniń rýhanı qanattanyp, qasıetti mekennen erekshe ásermen oralýlaryna sizderdiń aıtar nasıhattaryńyzdyń yqpaly mol ekenin esten shyǵarmaǵaısyzdar», – dedi QMDB Tóraǵasy.
Aıta keteıik, búgingi semınarda elimizdiń túkpir-túkpirinen iriktelgen 14 ýaǵyzshy ımamǵa naıb múftıler, bólim basshylary qajylyq saparyna qatysty túrli taqyrypta dáris ótkizýde.
