BAS MÚFTI: QMDB ISLAM QARJYSY SEKTORY AShYLADY
Bul týraly Qazaqstan musylmandary dinı basqarmasynyń tóraǵasy Naýryzbaı qajy Taǵanuly din qyzmetkerlerine joldaǵan Baǵdarlyq baıandamasynda habarlady.
«Allaǵa shúkir, halqymyzdyń Islam dinin ustanýy, sonymen qatar qoǵamda dinı sananyń kún sanap artýy adal tabysqa degen suranysty kúsheıtti. Musylmandar kúndelikti qarjylyq isterinde ósimqorlyqtan, ádiletsiz kelisimderden jáne kúmándi tabystan saqtanýǵa tyrysady. Sonyń nátıjesinde Islam qarjysy qaǵıdalaryna negizdelgen ónimder men qyzmetterge degen qajettilik arta tústi.
Qoǵamdaǵy bul suranys qarjy júıesiniń qurylymdyq ózgerýine túrtki bolýda. Dástúrli bank qyzmetterimen qosa ıslamdyq qarjylandyrý, seriktestikke negizdelgen kelisimder, lızıng, saqtandyrýdyń ıslamdyq túri sııaqty baǵyttarǵa suranys artýda. Bul qarjy júıesiniń ádilettilik pen áleýmettik jaýapkershilikke negizdelýine jol ashýda. Bul rette halyqtyń Islamǵa bet burýy sharıǵı qarjy salasynda pátýalardyń rólin arttyryp otyrǵanyn aıta ketken jón.
Qarjyǵa qatysty dinı suraqtardyń kóbeıýin jáne qoǵamda osy salaǵa baılanysty suranystyń artýyn eskerip, QMDB Islam qarjysy sektoryn ashý týraly sheshim qabyldadym. Atalǵan sektor qarjylyq ónimderge sharıǵı saraptama jasap, qoǵamǵa senimdi ári birizdi pátýa usynatyn bolady»,- dedi Bas múftı Naýryzbaı qajy Taǵanuly.
Aıta keteıik, lızıng, saqtandyrý, ınvestıtsııa, oblıgatsııa, tsıfrlyq aktıvter men Elektrondy tólem júıeleri sekildi jańa qarjylyq quraldarǵa sharıǵat turǵysynan baǵa berý – osy sektordyń basty mindetteriniń biri bolmaq.
