Bas múftı Qudııar Biláldi qabyldady (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Almaty qalasyna jasaǵan jumys sapary barysynda belgili qalamger, din janashyry Qudııar Bilálmen kezdesti.
Júzdesý barysynda dástúrli din men ulttyq qundylyqtardy keńinen nasıhattaý jaıy sóz boldy.
Qudııar Bilál «Qazaqtyń dástúrine jaqyndaı tússek, baıyrǵy qazaqty qaıta qalyptastyrar edik» degen usynysyn aıta kele meshitke keletin jamaǵatpen jumysty jandandyrý, dástúrli dinge basymdyq berý, ıshandyq mektepter jolyn zerdeleýge qatysty oı-pikirin bólisti.
«Ózińiz aıtyp otyrǵan handyq dáýirden beri jalǵanyp kele jatqan babalar mektebi, babalar joly – bizdiń de temirqazyǵymyz. Qazir biz bul joldy dástúrli ıslam dep túsindirip júrmiz. Ásilinde Islam dini dástúrli, dástúrsiz dep bólinbeıdi. Alaıda dástúrli ıslam dep qoldanýdaǵy maqsatymyz – qazaqtyń boıyna, qanyna, súıegine sińgen ata-babalar ustanǵan joldy dáripteý. Osy jolda ózderińizdiń oı-pikirlerińiz biz úshin mańyzdy» dep atap ótti Naýryzbaı qajy Taǵanuly.
Kezdesý sońynda Bas múftı qalamgerge syı-sııapat jasap, qurmet kórsetti.
