BAS MÚFTI QURANDY ÓRTEÝGE QATYSTY QMDB USTANYMYN MÁLIMDEDI (FOTO)
Búgin QMDB Tóraǵasy, Bas múftı Naýryzbaı qajy Taǵanuly Shvetsııada qasıetti kitabymyz Quran Kárimdi órteý oqıǵasyna qatysty QMDB ustanymyn málimdedi. Bas múftı 100-den astam musylman elderiniń múftıleri men ǵalymdary basqosqan halyqaralyq onlaın konferentsııaǵa qatysyp, óz oıyn bildirdi.
«Rasynda, kim Qurandy qurmettese Allaǵa qurmet kórsetken bolyp sanalady. Al Qurandy kemsitken adamnyń áreketi Allany kemsitkenmen teń. Demek, Qurandy qorlaǵan adamdy Qudaıdyń ózi qorlaıdy.
Shyn máninde, Qurandy saqtaýshy da, qorǵaýshy da bir Alla. Bul týraly qasıetti kitabymyzda bylaı baıandalǵan: «Shúbásiz, osynaý zikirdi (Qurandy) Biz túsirdik jáne onyń saqtaýshysy da Ózimiz» («Hıjr» súresi, 9-aıat).
Qurandy órteý – shekten shyǵýdyń eń úlkeni. Ol óziniń soraqy áreketimen búkil álemge búlik salyp otyr. Qurandy qorlaǵan, ony órtegen adamdy Allanyń ádil úkimine tapsyramyz. Meniń oıymsha, ol osy óreskel áreketimen óziniń adamǵa tán bolmysyn qorlady. Masqara isimen ózi masqara boldy!
Alla qalasa, aldaǵy juma kúninde elimiz boıynsha meshitterde «Quranǵa qurmet» taqyrybynda juma ýaǵyzy aıtylady. Rasynda, Quranǵa qurmet kórsetken qoǵam baqytty! Óıtkeni, Quran – eki dúnıe baqytyna jeteleıtin kitap. Alla Taǵala barshamyzǵa Qurandy qos ómirimizdiń rýhanı shamshyraǵyna aınaldyrǵaı. Ámın!» dedi Naýryzbaı qajy Taǵanuly.
Halyqaralyq onlaın konferentsııada sóz alǵan Túrkııa, Pákistan, Sýdan, Malaızııa, Palestına elderiniń din ǵulamalary jáne halyqaralyq uıymdardyń basshylary qasıetti Qurandy órteý isin qatań aıyptady.
