Bas múftı Qurban aıtta balalardy shattyqqa bóledi (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Qurban aıt merekesine oraı elordada ornalasqan «Ónege» ońaltý ortalyǵynda bolyp, qaıyrymdylyq is-sharaǵa qatysty.

Ortalyq jetekshisi Gúlim Qaıyrqyzy Bas múftıge sal aýrýyna shaldyqqan balalardy emdeý baǵytyndaǵy jumystarymen tanystyrdy. QMDB Tóraǵasy Naýryzbaı qajy Taǵanuly Qurban aıt merekesine oraı «Ónege» ońaltý ortalyǵynda emdelip júrgen balalarǵa qımyl-qozǵalysty durystaýǵa, nyq qadam basýǵa múmkindik beretin 2 dana «Gross trenajeri» qurylǵysyn syılap, aıttyq úlestirdi. Sonymen qatar birneshe balanyń tusaýyn kesip, Alladan saýyǵyp ketýin tilep, duǵa jasady.

«Adam balasy osy ómirde túrli deńgeıde synaqtardy bastan keshedi. Alla Taǵala osy synaqty kórkem sabyrmen eńserýge kúsh-qýat bersin. Musylman balasy Qudaıdan eshqashan kúder úzbeıdi. Jańa kúnnen jaqsylyq kútip, izgilikke umtylady. Alla qalasa bul kúnder de artta qalyp, qýanyshty sátterińiz kóp bolsyn», – dedi Naýryzbaı qajy Taǵanuly.

Qaıyrymdylyq is-sharasy merekelik baǵdarlamaǵa ulasyp, balalar ortada óz ónerin pash etti. Óz kezeginde «Ónege» ońaltý ortalyǵynyń jetekshisi Gúlim Qaıyrqyzy men ata-analar saýapty iske uıytqy bolǵan Bas múftı bastaǵan «Zeket jáne qaıyrymdylyq» qorynyń ókilderine alǵysyn bildirdi.

Aıta ketsek, búginde atalǵan ortalyqta 60 bala emdelýde.

 

Источник: Aidos