BAS MÚFTI QYZYLORDADA QARTTARMEN KEZDESTI (FOTO)
Qazaqstan musylmandary dinı basqarmasynyń tóraǵasy Naýryzbaı qajy Taǵanuly Qyzylorda oblysyna barǵan saparynda 1 qazan – Halyqaralyq qarttar kúni qarsańynda qarııalarmen kezdesip, merekemen quttyqtap, izgi nıetin jetkizdi.
«Arnaýly áleýmettik qyzmetter kórsetý ortalyǵynda» ótken kezdesýde Naýryzbaı qajy Taǵanuly: «Iman shartyn júregine bekitken musylman jaqsylyq pen jamandyq Alladan dep qabyldaıdy. Nyǵmetke kenelse – shúkir etedi, qıyndyqqa tap bolsa tózimdilik tanytady. Ýaqytsha synaqty áýeli Allanyń járdemimen, ımanymyz ben sabyrymyzdyń arqasynda jeńip shyǵýǵa kóbirek úmit artý kerek. Alla Taǵala qasıetti Quranda: «(Musylmandar) Bosamańdar da qaıǵyrmańdar. Eger múmin bolsańdar, álbette ústem bolasyńdar» («Álı Imran» súresi, 139-aıat), – dep musylman balasyn súıinshilegen. Jaratýshy Iemiz sizderge kúsh-qýat, myqty densaýlyq pen bar jaqsylyǵyn násip etsin!» dedi.
Kezdesýden keıin Bas múftı qarııalarǵa duǵa jasap, qurmetpen syı-kádesin tartý etti.
Aıta ketsek, búginde bul ortalyqta 145 qarııa bar.
