Bas múftı Ramazan aıyna baılanysty halyqqa úndeý jasady (FOTO)
Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz Ramazan aıyna baılanysty úndeý jasady, dep habarlaıdy Sputnik Qazaqstan tilshisi.
Aldymen, Bas múftı bıylǵy Ramazan aıynyń qaı ýaqytta bastalatynyn aıtty.
"Sharıǵattyń barlyq talabyn negizge aldyq. Elimizdegi astronomııalyq zertteý ortalyqtarynyń ǵylymı málimetine súıendik. Sondyqtan osy jyly Ramazan aıy 6 mamyrdan bastalady. Al Aıt merekesi 5 maýsymǵa týra keledi. Qasıetti Qadir túni 31 mamyrdan 1 maýsymǵa qaraǵan túnge sáıkes keledi. Bıyl Ramazan aıy 30 kúnge sozylady", - dedi Bas múftı Qazaqstan musylmandary dinı basqarmasynda ótken brıfıngte.
Sondaı-aq, Serikbaı qajy Oraz pitir sadaqanyń mólsherin aıtty.
"Qazaqstan musylmandar dinı basqarmasy janyndaǵy ǵulamalar keńesiniń sheshimimen bıylǵy jyldyń Ramazan aıynda kisi basyna pitir sadaqanyń mólsherin belgiledik. Iaǵnı elimizdegi azyq-túliktiń onyń ishinde bıdaı men unnyń ortasha esebin ala otyryp, jan basyna shaqqandaǵy pitir sadaqanyń mólsherin 300 teńge dep belgilendi", - dedi Bas múftı.
Serikbaı qajy Oraz barsha qazaqstandyqtardy qasıetti aıda ıgilikti ister jasaýǵa shaqyrdy.
"Ramazan –qaıyrymdylyq pen izgiliktiń aıy. Allanyń rızashylyǵy úshin árbir musylman óziniń nápsin tyıyp, 30 kún boıy oraza ustap, ishýden jeýden tyıylsa, orazanyń saýaby esebinen onyń kúnásine keshirim bolady. Sondyqtan qazaqstandyqtardy qasıetti Ramazan aıynda kóptegen qaıyrymdylyq is-sharaǵa belsene qatysýǵa shaqyramyn", - dep túıindedi sózin Serikbaı qajy Oraz.
