Bas múftı RANT múshelerine dáris oqydy (FOTO)
QMDB Tóraǵasy, Bas múftı Naýryzbaı qajy Taǵanuly RANT músheleriniń biliktiligin arttyrýǵa arnalǵan semınarǵa qatysyp, dáris oqydy.
Bas múftı «Ýaǵyz aıtýdyń ádebi men ýaǵyzshynyń mindeti» taqyrybynda sóz qozǵap, el arasynda jamaǵatqa ýaǵyz aıtyp júrgen RANT múshelerine birneshe keńesin jetkizdi.
«Ózderińiz jaqsy bilesizder, adamǵa aıtylar nasıhattyń ýaqyty men orny bolady. Halyqqa aıtar sózimizdi, ıaǵnı Islam qundylyqtaryn úreılendirip emes, súıinshilep jetkizýimiz kerektigin eshqashan esten shyǵarmaǵaısyzdar. Bul jóninde ardaqty Paıǵambarymyz Muhammedtiń (oǵan Allanyń salaýaty men sálemi bolsyn) hadısi bar ekenin jaqsy bilesizder. Ýaǵyz aıtý, nasıhat jetkizý kezinde buıryq raımen sóılemegen abzal. Óıtkeni, tyńdaýshylar arasynda jasy da, jasamysy da bolady. Nasıhat aıtqan sátte aýdıtorııanyń jas erekshelikterin de eskere júrgenderińiz jón», – dep atap ótti.
Sondaı-aq búgingi semınarda naıb múftı Sansyzbaı Qurbanuly («Fıqh ádisnamasyndaǵy keıbir máseleler»), Dinı bilim jáne kadr daıarlaý bóliminiń meńgerýshisi Smaıyl Seıtbekov («Islam tarıhyndaǵy saıası oqıǵalar») pen bloger, Din isteri komıtetiniń dinı qyzmet salasyndaǵy quqyq qoldaý praktıkasynyń basqarmasynyń basshysy Beıimbet Qasymbekuly («Zaıyrlylyq jáne dinı senim bostandyǵy»), SMM-mamany Tımýr Bektur («Áleýmettik jelini tıimdi paıdalanýdyń joldary») RANT múshelerine dáris oqydy.
