Bas múftı sarbazdarǵa rýhanı turǵydan qoldaý bildirdi (FOTO)
Qazaqstan musylmandary dinı basqarmasynyń tóraǵasy Naýryzbaı qajy Taǵanuly elordada ótken ıgi-is sharaǵa qatysty.
Respýblıkalyq «Áziret Sultan» meshitinde Bas múftı bastaǵan din qyzmetkerleri ystyq tamaq pen azyq-túlik salynǵan sebetterdi Nur-Sultan-Qaraǵandy tasjolynda ornalasqan blokposttaǵy sarbazdarǵa úlestirdi.
«Memleketimiz elimizde bolǵan jaǵdaıdy qalypqa keltirý úshin qajetti sheshimder qabyldap, tıisti is-sharalardy júzege asyrýda. Bizdiń de az da bolsa úlesimiz bolsyn degen nıetpen sarbazdarymyzǵa as-sý ákelip, olarǵa rýhanı turǵydan qoldaý kórsetip jatyrmyz. Alla Taǵala elimizdiń shetin jaýdan, ishin daýdan saqtasyn», – dep atap ótti Naýryzbaı qajy Taǵanuly.
Aıta ketsek, elimizdegi barlyq meshit ımamdary blokposttarda sarbazdarǵa ystyq tamaq pen azyq-túlik úlestirýde.
