BAS MÚFTI SARYAǴAShTA MEShITTIŃ AShYLÝYNA QATYSTY (FOTO)

16 qarasha 2023 1227 0 Оqý rejımi

Búgin Túrkistan oblysy Saryaǵash aýdanynda ortalyq meshit kúrdeli jóndeýden ótip, keńeıtilip qaıta ashyldy. Saltanatty rásimge Qazaqstan musylmandary dinı basqarmasy tóraǵasy, Bas múftı Naýryzbaı qajy Taǵanuly arnaıy qatysty.

Eń aldymen qasıetti Quran aıattary oqylyp, batasyn Bas múftı jasady. Alǵash quttyqtaý sóz alǵan QMDB Tóraǵasy aýdan halqyn quttyqtap, meshittiń máni jaıynda aıtyp ótti.

«Búgin Allanyń qalaýymen Saryaǵash jerine keldik. Eń birinshi mynadaı ǵajap meshittiń ashylýy jergilikti jamaǵat úshin qýanyshty jaǵdaı. Meshit salýdyń saýaby qanshalyqty úlken ekeni jaıynda Alla Taǵala Quran Kárimde: «Alla Taǵalanyń meshitterin tek Allaǵa jáne aqyret kúnine ıman etken, namaz oqyǵan, zeketin bergen jáne Alladan basqa eshkimnen qoryqpaıtyndar ǵana salady», – deıdi. Alla Taǵala amaldarymyzdy rııadan alys qylyp, saýabyn tolyq kúıinde bergeı. Adam balasynyń qulshylyǵyn ótep, minajat etetin mekeni de osy meshit. Táýbege keler tusy da osy jer.

Meshit – adamdy jamandyqtan tyıyp, jaqsylyqqa, izgilikke bastaıdy. Ómirge degen úmit shyraǵyn jaǵady. Sondyqtan búgingi meshitimiz talaı janǵa meıirim shýaǵyn syılap, ıgi ister atqarýyna sebep bolar oryn bolsyn deımin. Alla Taǵala qulshylyq úıin salǵanǵa, atsalysqanǵa, osy qurylys úshin duǵada bolǵanǵa jánnatta sondaı úımen súıinshilenýin násip etsin. Nıetterińiz qabyl bolsyn» dep izgi tilegin jetkizdi.

Budan keıin aýdan ákimi Arman Abdýllaev pen ardagerler keńesiniń tóraǵasy Mustafa Súleımenov jergilikti aýdan jurtyna ıgi tilegin bildirip, quttyqtaý lebizin arnady. Is-shara barysynda meshitke úles qosqan birneshe belsendi jamaǵatqa Bas múftı atynan alǵys hat tabystaldy.

Aıta keteıik aýdandyq meshit sońǵy bir jylda keńeıtilip, jalpy syıymdylyǵy 2500 adamǵa shaqtalyp, qaıta ashylyp otyr.