BAS MÚFTI SARYAǴAShTA ÓTKEN MÁÝLIT KEShINE QATYSTY (FOTO)

Búgin Túrkistan oblysyna jumys sapary aıasynda Qazaqstan musylmandary dinı basqarmasynyń tóraǵasy Naýryzbaı qajy Taǵanuly «Saryaǵash» medrese-kolledjiniń uıymdastyrýymen ótken Máýlit keshine qatysty. 

Máýlit keshinde Bas múftı jamaǵatqa izgi nıetin jetkizip, nasıhat aıtty.

«Biz Alla Elshisin ardaqtaımyz. Esimin qurmet qylamyz. Sodan bolar qazaq jerinde Máýlit merekesi birneshe aı qatarynan jalǵasyp, atap ótiledi. Munyń astarynda úlken nasıhat jatyr. Ol – dinimizdiń nasıhaty. Paıǵambarymyzdyń (oǵan Allanyń salaýaty men sálemi bolsyn) ómirinen alar úlgi kóp. Qurannyń «Ahzab» súresiniń 21-aıatynda Alla Taǵala: «Shúbásiz, Alla elshisinde sender úshin qaı jaǵynan alsaq ta, teńdessiz úlgi-ónege bar» - dep, Paıǵambar ómirin bizderge shamshyraq etken. Olaı bolsa, Paıǵambarymyz kórsetken, nasıhattaǵan izgi qoǵamdy qalyptastyrýda osyndaı máýlit jıyndarynyń mánisi óte zor. 

Búgingi Máýlit keshinde asyl dinimizdiń kókjıegin keńeıtýde baryn salǵan bizdiń aıaýly ustazdarymyzdy da eske aldyq. Alla olarǵa razy bolyp, Óz Meıirimine bólesin!

Qadirli Máýlit keshiniń qonaqtary! Alla Taǵala barshamyzdyń qoǵamǵa, ózgelerge, aınalaǵa paıdaly bolýymyzdy násip etsin. Alla saýaptan jazsyn! Bilim jolynda júrgen baýyr-qaryndastarymyzǵa Alla qýat, sabyrlyq násip etsin! Máýlit keshi qutty bolsyn» dedi. 

Keshte ardaqty Alla Elshisine salaýattar aıtylyp, belgili aqyn, jyrshy Jáken Omarov máýlit jyryn aıtty. Odan bólek medrese shákirtteri arnaý jyryn oqydy. Belgili ónerpazdar kúı tartyp, máýlit keshine kórik syılady.

​Derekkóz: QMDB Baspasóz qyzmeti