BAS MÚFTI SEZDE SEKTsIIa OTYRYSYN JÚRGIZDI (FOTO)
Búgin elordadaǵy Táýelsizdik saraıynda Álemdik jáne dástúrli dinder lıderleri VII seziniń sektsııalyq otyrysy ótti. «Áıelderdiń qazirgi qoǵamnyń ál-aýqaty men turaqty damýyna qosqan úlesi jáne áıelderdiń áleýmettik mártebesin qoldaýdaǵy dinı qaýymdastyqtardyń róli» taqyrybyndaǵy tórtinshi sektsııa jumysyn QMDB Tóraǵasy, Bas múftı Naýryzbaı qajy Taǵanuly júrgizdi.
QMDB Tóraǵasy Islam dininde áıelge aıryqsha mártebe berilgenin aıta kelip: «Imandylyq jolyn ustanǵan halqymyz qyz-kelinshekti qurmetteýdiń erekshe úlgisin kórsetken. Názik jandy qurmetteýge kelgende ony tipti tórge shyǵarǵan, al tárbıesine kelgende qyzdy qyryq úıden tyıǵan. Osy tyıymnyń bári áıeldiń ımany men qurmetin, ary men uıatyn qorǵaıdy.
Jaratýshy Iemiz «Nısa» súresiniń 19-aıatynda: «Áıelderińmen jaqsy turyp, jaqsy qarym-qatynasta bolyńdar», – dep buıyrǵan. Al ardaqty Paıǵambarymyz Muhammed (oǵan Allanyń salaýaty men sálemi bolsyn): «Iman turǵysynan múminderdiń eń kámili – minez-qulqy eń jaqsy bolǵandar. Senderdiń eń ardaqtylaryń − jarlary men balalaryna jaqsy qaraǵandaryń. Aralaryńda januıasyna eń jaqsy qaraıtyn menmin», – dep sózimen de, isimen de úlgi-ónege kórsetken», – dedi.
Sektsııa otyrysynda konfessııalyq keńistiktegi qazirgi zamanǵy áıeldiń beınesi, qazirgi áıeldiń ómirindegi dinniń róli, dinniń otbasyndaǵy jáne qoǵamdaǵy áıelderdiń róline kózqarasy, áıeldiń áleýmettik mártebesin qoldaýdaǵy jáne genderlik teńdikti qamtamasyz etýdegi dinniń róli, dástúrli otbasylyq qundylyqtardy nyǵaıtýǵa dinniń qosqan úlesi, áıelder jáne adamı baýyrlastyq murattaryn tárbıeleý t.b .taqyryptar sóz boldy.
Basqosý barysynda IYU janyndaǵy Islam tarıhyn, óneri men mádenıetin zertteý ortalyǵynyń basshysy Mahmýd Erol Kılıch, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary, Senat depýtaty Lázzat Súleımen, BAÁ-niń Toleranttylyq jáne birge ómir súrý mınıstrligi keńsesiniń bas dırektory Afra Muhammed ál-Saabrı, «Aqnıet» aqparattyq-nasıhattaý jáne ońaltý ortalyǵynyń teology Nurjan Stambakıev, «UniãoPlanetária» prezıdenti Isıs Marııa Borges de Resende, UNICEF izgi nıet elshisi Dınara Sádýaqasova, Senat janyndaǵy «Jas sarapshylar klýbynyń» múshesi Juldyzaı Isqaqova baıandama jasap, áıelderdiń qoǵamdaǵy róline toqtaldy.
