Bas múftı: Shetelde dinı bilim alýǵa qajettilik joq (FOTO)

Búgin Qazaqstan musylmandary dinı basqarmasynyń tóraǵasy Serikbaı qajy Oraz Jambyl oblysyna 2 kúndik is-saparmen bardy. Bas múftı bastaǵan din qyzmetkerleri Jambyl oblysy əkiminiń mindetin atqarýshy Bekbolat Orynbekovpen kezdesti. 

Kezdesýde óńirdiń qazirgi dinı ahýaly, meshit-medreselerdiń jumysy sóz boldy. Bekbolat Serikbekuly oblysta 295 meshit bar ekenin, onda 400-den astam ımam qyzmet etip jatqanyn jetkizdi.

"Qurmetti Serikbaı qajy Satybaldyuly! Kıeli Taraz shaharyna qosh keldińiz. Sizdiń saparyńyz qasıetti Əýlıeata eliniń rýhanı ómirine rýhanı serpin beredi dep sanaımyn. Búginde oblys əkiminiń tapsyrmasymen óńirimizde dinı salada irgeli jobalar júzege asyp jatyr. Respýblıkaǵa tanymal teolog-ǵalymdardy arnaıy shaqyrtyp, dinı saýatty arttyrý baǵytynda semınar uıymdastyryp kelemiz. Din qyzmetkerleriniń de əleýmettik jaǵdaıyna kóńil bólip kelemiz", - dedi oblys ákiminiń mindetin atqarýshy Bekbolat Orynbekov.

Óz kezeginde Bas múftı Serikbaı qajy Oraz ımamdardy Elektrondy attestatsııadan ótkizý jańa jumys jobasy Jambyl oblysynan bastalǵanyn baıandady.

"Rasynda, elimizdegi joǵary jəne orta bilim beretin dinı oqý oryndarynda Islam baǵytynda ilim alýǵa tolyq múmkindik bar. Shetelge baryp, sarsańǵa túsýdiń qajeti joq. Medreselerimiz kolledj deńgeıine kóterildi. "Nur Múbərak" ýnıversıtetinde magıstrlik, tipti doktorlyq dəreje alyp shyǵýǵa bolady. Qazir bizdiń ýnıversıtetimiz ben medreselerimizdi jyl saıyn 500-ge jýyq maman bitirip shyǵady. Demek, biz nebary birneshe jyl ishinde 2600 meshitimizdi din qyzmetkerimen tolyq qamtamasyz etetin bolamyz", - dep atap ótti Bas múftı Serikbaı qajy Oraz.