BAS MÚFTI TARAZDA ZIIaLY QAÝYM ÓKILDERIMEN, STÝDENTTERMEN SUHBATTASTY
Qazaqstan musylmandary dinı basqarmasynyń tóraǵasy Naýryzbaı qajy Taǵanuly Jambyl oblysyna barǵan saparynda M.H. Dýlatı atyndaǵy Taraz ýnıversıtetinde zııaly qaýym ókilderimen, atalǵan oqý orynda bilim alyp jatqan stýdenttermen kezdesti.
Basqosýda Bas múftı múftııattyń dinı salada túrli baǵytta atqaryp kele jatqan jumystary jaıly baıandaı kele, qoǵamda otbasy qundylyǵyn nasıhattaý, jastardy ımandylyqqa tárbıeleý, bilim alý men rýhanı birlikti nyǵaıtýdyń mańyzy jaıly aıryqsha atap ótti.
«Qazirgi tańda biz jańa zamannyń jańa syn-qaterlerimen betpe-bet kelip otyrmyz. Din dushpandary endi ashyq soǵys júrgizbeıdi. Olardyń ádisteri basqasha. Dinimiz ben dástúrimizge saı kelmeıtin teris ıdeologııalyq kózqarastardy taratý arqyly musylmandardyń ishki alaýyzdyǵyn týdyrýǵa tyrysýda. Bizdiń qundylyqtarymyzdy ózgertýge, san ǵasyrdan beri qalyptasqan salt-dástúrimizdi buzýǵa, Islam bolmysyn álsiretýge umtylýda.
Asyl dinimiz mundaı syn-qaterlerge qarsy turýdyń naqty joldaryn da kórsetedi. Mundaı sátte eń áýeli dinimiz ben dástúrimizdi berik ustanýymyz qajet. Bilim alyp, ǵylym salasynda jańa belesterdi baǵyndyrýymyz kerek. Sondaı-aq qoǵamnyń pikir qaıshylyǵyna jol bermegen jón. Kelispeýshilik qashan da jeńiliske ákep soǵatyny tarıhtyn belgili. Musylman úmbeti ózara talasqan saıyn olardyń rýhtary túsip, kúsh-qýaty azaıady» dedi Bas múftı Naýryzbaı qajy Taǵanuly.
Kezdesýde zııaly qaýym ókilderi qoǵamdaǵy ózekti máseleler jaıly piririn aıtsa, stýdentter Bas múftıge kókeıde júrgen suraqtaryn qoıyp, jaýap aldy.
