Bas múftı tóraǵalyǵymen kezekten tys Tóralqa májilisi ótti (FOTO)
Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasynyń kezekten tys Tóralqa májilisi ótti.
Májiliske naıb múftıler, bólim meńgerýshileri, oblys jáne respýblıkalyq mańyzy bar qalalardyń bas ımamdary qatysty.
Jıynda negizgi úsh másele qaraldy. Olar – osy aıda elordada Táýelsizdiktiń 30 jyldyǵyna oraı ótetin halyqaralyq konferentsııa, jeltoqsan aıyna josparlanǵan QMDB-nyń jyldy qorytyndylaý Tóralqa májilisi jáne elordadaǵy «Nur Astana» meshitiniń ataýyn ózgertý jónindegi Ǵulamalar keńesinen kelip túsken usynys.
«Egemendik alǵanymyzǵa 30 jyl tolýyna oraı uıymdastyrǵaly otyrǵan aýqymdy konferentsııaǵa Túrkııa, Ózbekstan men Qyrǵyzstan, Tájikstan, Reseı men Bashqurtstan, sondaı-aq Mońǵolııa memleketteriniń múftıleri, otandyq din ǵalymdary men ımamdar qatysady. Qazirgi kezde konferentsııanyń arnaıy jumys toby qurylyp, daıyndyǵyn pysyqtaýda. Alla Taǵala irgeli jıynymyzdyń sátti ótýin násip etsin», – dedi Bas múftı.
Atalǵan konferentsııa baǵdarlamasy men daıyndyǵy jóninde Dinı bilim jáne kadr daıarlaý bóliminiń meńgerýshisi Smaıyl Seıtbekov baıandasa, jyldy qorytyndylaý Tóralqa májilisi jaıynda Apparat basshysy Ǵylymbek Jádigeruly baıandama jasady.
Sondaı-aq Tóralqa májilisinde elordadaǵy «Nur Astana» meshitiniń ataýyn ózgertý jónindegi Ǵulamalar keńesiniń usynysy talqylanyp, QMDB bólim basshylary, oblys ımamdary men Ortalyq apparat qyzmetkerleri meshit ataýynyń ózgerýin qoldap, daýys berdi. Nátıjesinde 15 jyldyq tarıhy bar meshit endigi tańda oıshyl, ǵulama Ábý Nasyr ál-Farabı esimimen atalmaq.
