Bas múftı túlekterge dıplom tabystady (FOTO)
Bas múftı Serikbaı qajy Oraz «Astana» medrese-kolledjin bitirýshi túlekterge dıplom tabystaý rásimine qatysty, dep habarlaıdy ummet.kz tilshisi.
Táýelsizdik pen elimizde qalyptasqan tynyshtyqtyń arqasynda dinı oqý ordalarynyń áleýeti men bilim sapasy jyl saıyn artyp keledi. Esterińizde bolsa, oraza aıt kúni Prezıdent Qasym-Jomart Toqaev «Astana» medrese-kolledjine arnaıy at basyn buryp, oqý baǵdarlamalary men medrese jumysyna dán rızashylyǵyn bildirgen edi. Bunyń ózi elimizde azamattardyń dinı erkindikteri men bostandyqtarynyń asa joǵary qurmetteletindiginiń belgisi.
Búgin «Nur Astana» meshitinde atalǵan medreseniń bitirýshi túlekterine dıplom tabystaý rásimi ótti.
Saltanatty sharaǵa Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz, QMDB tóraǵasynyń Birinshi orynbasary, Nur-Sultan qalasy boıynsha ókil ımam, respýblıkalyq «Áziret Sultan» meshitiniń Bas ımamy Naýryzbaı qajy Taǵanuly, «Nur Astana» meshitiniń Bas ımamy Muqanov Asqar Ábitaıuly, «Astana» medrese-kolledjiniń dırektory Ibragım Smataev jáne medrese ustazdary men meshit aqsaqaldary qatysty.
Áýeli, qasıetti Quran aıattary oqylyp, Bas múftı bitirýshi túlekterge aq batasyn berdi. Quttyqtaý sóz sóılegen Bas múftı shákirtterge bilimniń mańyzy jáne elimizdegi dinı ahýal jaıynda sóz qozǵap, elge tutqa bolatyn, bilikti maman bolýǵa shaqyrdy.
«Dinı bilim alý úshin elimizde barlyq múmkindik jasalǵan. Islam dini órkenıettiń, ǵylym men úderistiń ozyq túrlerine toqtaý salyp, jasandy túrde tejeýshi bolatyn din emes. Islam órkenıetti alǵa súıreıtin, ǵylym men damýdyń dini. Osyny is júzinde kórsetýlerińiz kerek. Sonymen birge, qoǵamshyl, kópshil bolýymyz kerek. Qaraqan basynyń qamyn oılaýmen adam balasy uzaqqa barmaıdy, bıik belesterdi baǵyndyra almaıdy. Ásirese, din salasynda júrgen azamattar basqa otandastarymyzǵa úlgi bolatyn, kóptiń qamyn oılaıyn azamattardan bolýy tıis», – dedi Bas múftı Serikbaı qajy Satybaldyuly.
Qazirgi tańda «Astana» medrese-kolledjiniń qazaq tobynda 70, orys tobynda 37, jalpy 107 shákirt tálim alyp jatyr. Olar elimizdiń túkpir-túkpirinen kelgen azamattar. Aıtalyq, Túrkistan oblysynan 25, Shymkent qalasynan 7, Qyzylorda qalasynan 10, Oral qalasynan 13, Aqtóbe qalasynan 4, Shyǵys Qazaqstan oblysynan 8, Qaraǵandy qalasynan 13, Pavlodar qalasynan 3, Atyraý qalasynan 3, Taldyqorǵan qalasynan 2 bala bilim nárimen sýsyndaýda. Oqý oryny bıyl túlekterdiń 9-legin attandyryp otyr.
Osyǵan oraı, Bas múftı Serikbaı qajy Satybaldyuly medrese jumysynyń alǵa basýy úshin aıanbaı jumys jasaǵan ustazdar men qyzmetkerlerge alǵys hat jáne syıaqy tabys etti. Sonymen birge medrese túlekterine de dıplom tabystady.
Is-shara aıasynda Birinshi naıb múftı Naýryzbaı qajy Taǵanuly medreseniń tynys-tirshiligine árdaıym kóńil bólip, jiti nazarda ustap kele jatqan Bas múftıge, sapaly bilim berý jolynda eńbek etip kele jatqan medrese ujymyna, demeýshilik jasaǵan «Zeket» qory men jomart azamattarǵa alǵys bildirip, túlekterdi búgingi dıplomdarymen quttyqtady.
Osyǵan deıin medreseden 258 túlek bitirse, bıyl medreseden 25 shákirt oqýyn támamdady. Bitirýshi túlekterdiń ishinde bir shákirt Quran Kárimdi tolyq jattap qarı atanyp otyr.
Saltanatty sharanyń sońynda meshit aqsaqaly duǵa jasap, túlekterge aldaǵy qyzmetterine, ómir jolyna baq-bereke, sáttilik tiledi.
