BAS MÚFTI TURǴYNDARǴA «RAMAZAN SYIYN» TABYSTADY (FOTO)
Petropavl qalasynda Qazaqstan musylmandary dinı basqarmasy uıymdastyrǵan aýyzashar dastarqanynda birqatar turǵynǵa «Ramazan syıy» tabystaldy. Izgi sharaǵa Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly arnaıy qatysyp, syıdy óz ıelerine tabystady.
Eń aldymen jergilikti «Zeket jáne qaıyrymdylyq» qorynyń uıymdastyrýymen Qyzyljar ortalyq meshitiniń naıb ımamy Maqsat Jumajanovqa qyzmettik páter berilse, «Qolma-qol» aktsııasy aıasynda osy óńirden shyǵyp dinı bilim alyp jatqan 20-dan asa shákirtke bir rettik syıaqy retinde 1 500 000 teńgeniń sertıfıkaty tabystaldy. Sonymen qatar baýyr aýrýyna shaldyqqan Arman Ospanovtyń emine dep «Ómirge úmit syıla» aktsııasy barysynda bir mıllıon teńgeniń sertıfıkaty syıǵa berildi.
Aýyzashar dastarqany kezinde 40 jylǵa jýyq ustazdyq etken, meshit janashyry Qymbat ájeıge Bas múftı óz atynan qajylyqqa joldama berip qýantsa, óńirdegi zııaly qaýymnyń úlkeni 95 jasqa taıaǵan Zeınolla Oljabaı aqsaqaldyń ıyǵyna shapan jaýyp, qurmet kórsetti. Odan bólek jergilikti qaıyrymdy isterge qulyshynys bildirip júretin birqatar azamattar Bas múftıdiń Alǵys hatyna ıe boldy.
Qaıyrymdylyq is-shara aıasynda Bas múftı aýyryp jatqandardyń dertine shıpa tilep, baspanaly bolǵan jandardy quttyqtap, mundaı izgi ister áli de jalǵasatynyn jetkizdi.
