BAS MÚFTI TÚRKIIa ELShILIGINE KÓŃIL AITTY (FOTO)
Búgin QMDB Tóraǵasy, Bas múftı Naýryzbaı qajy Taǵanuly Túrkııa Respýblıkasynyń elimizdegi elshiligine arnaıy baryp, baýyrlas memlekette bolǵan jer silkinisine baılanysty kóńil aıtty.
Bas múftı aldymen kóńil aıtý kitabyna jazba qaldyrdy.
«Túrkııa – túbi bir týysqan el. Biz baıyrǵy baba-batyr túrkiniń kindiginen taraǵan urpaqpyz. Tilimiz jaqyn, tilegimiz bir. Baýyrlas eldiń basyna kelgen qaıǵy – bizdiń de qaıǵymyz. Qazaq halqy júregimen sizdermen birge. Alla Taǵala tabıǵı apattan qaza tapqan jandardyń dárejesin arttyryp, jánnatyn násip etkeı. Jaraqat alǵan azamattardyń tezirek saýyǵyp ketýin tileımin» dep jazdy Naýryzbaı qajy Taǵanuly.
Budan keıin QMDB Tóraǵasy Túrkııanyń Qazaqstandaǵy Tótenshe jáne Ókiletti Elshisi Ýfýk Ekıdjı myrzamen jáne onyń din isteri jónindegi keńesshisi Neshet Býdýrmen kezdesip, kóńil aıtty. Sondaı-aq tabıǵı apattan qaza tapqandardyń rýhyna arnaıy Quran baǵyshtap, qınalyp jatqan turǵyndarǵa Alla Taǵaladan jeńildik surady.
