BAS MÚFTI USTAZDAR MEN ShÁKIRTTERGE QURMET KÓRSETTI (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Mysyr Arab Respýblıkasyna saparynda ustazdar men shákirtterge qurmet kórsetti.

Bas múftı «Talaba» qaýymdastyǵyna múshe stýdenttermen kezdesý barysynda Násáfı aqıdasyna Hýsamýddın as-Syǵanaqıdyń túsindirme kitaby boıynsha shákirtterge ıjaza berý rásimine qatysty. Imam Matýrıdı aqıdasynyń bilgiri, doktor Abdýlla Ismaıyl qazaq stýdentterimen atalmysh kitapty tolyqtaı oqyp shyqqan. Bas múftı Naýryzbaı qajy Taǵanuly qazaq dalasynan shyqqan ǵulama babamyzdyń eńbegin shákirtterge úıretken Abdýlla ustazǵa qurmet kórsetip, syı jasady. Óz kezeginde doktor Abdýlla Ismaıyl QMDB Tóraǵasyna óziniń aqıda, hadıs kitaptaryna jazǵan túsindirme eńbekterin syıǵa tartty.

Sondaı-aq Bas múftı Quran Kárimnen 10 qyraǵat ıesi, qarı ustaz Abdýrrahman Ahmadqa da qurmet kórsetip, ustazǵa jáne odan Quran ıjazasyn alǵan qazaq shákirtterine Qazaqstannan arnaıy ákelgen kádesyılaryn tabystady. Aıta keteıik, ustaz Abdýrrahman Ahmad Mysyrda bilim alyp jatqan qazaq shákirtterin qarılyqqa baýlyp júr. Búginde Abdýrrahman ustazdyń jetekshiligimen 6 qazaq shákirti qarı atansa, jyl sońyna deıin taǵy 10 qazaq shákirti qarı atanbaq.