Bas múftı Venada ótken halyqaralyq konferentsııaǵa qatysty (FOTO)

Qazaqstan musylmandary dinı basqarmasynyń tóraǵasy Serikbaı qajy Oraz Avstrııa astanasy Vena qalasynda Qavkaz musylmandary basqarmasynyń uıytqy bolýymen ótken «Dinaralyq, órkenıetaralyq yntymaqtastyqtan jalpyadamzattyq tilektestikke deıin» atty halyqaralyq konferentsııaǵa qatysty.

Halyqaralyq sharanyń ashylý saltanatynda Ázirbaıjan Respýblıkasy Prezıdentiniń qoǵamdyq-saıası máseleler boıynsha kómekshisi Álı Gasanov memleket basshysy Ilham Álıevtiń konferentsııa qatysýshylaryna joldaǵan quttyqtaý haty men úndeýin oqyp berdi. Sodan keıin «Jalpyadamzattyq syn-tegeýrin» fılmi kórsetildi.

Minberde sóz alǵan Qapqaz musylmandary basqarmasynyń tóraǵasy Allashúkir Pashazade, KAICIID dinaralyq, mádenıetaralyq suhbat halyqaralyq ortalyǵynyń Bas hatshysy Feısal ıbn Mýammar, Adam quqyǵy jáne jahandyq suhbat jónindegi Jeneva ortalyǵynyń atqarýshy dırektory Idrıs Jezaırı, Birikken Arab Ámirlikteri Prezıdentiniń Din isteri jónindegi keńesshisi Álı Abdýrahman ál-Gashım, t.b. halyqaralyq uıymdar, ortalyqtar men memlekettik mekeme basshylary búgingi adamzat balasyna tónip turǵan qaýip-qaterlerdi aldyn alýdyń tetikteri men joldary jaıly baıandama jasady.

Konferentsııa sońynda Vena deklaratsııasy qabyldandy. Deklaratsııada osy baǵytta halyqaralyq forýmdardy ótkizip turýdyń mańyzdylyǵy, jalpyadamzattyq qundylyqtardy nasıhattaýdyń ózektiligi atap kórsetilgen.