Bas múftı Jambyl oblysynyń ákimimen kezdesti (FOTO)
Bas múftı Naýryzbaı qajy Taǵanuly Taraz qalasyna jasaǵan sapary barysynda Jambyl oblysynyń ákimi Nurjan Nurjigitovpen kezdesti.
QMDB Tóraǵasy óńir basshysy Nurjan Moldııarulynyń jańa qyzmetine tabys tilep, Taraz tórinde ótken halyqaralyq konferentsııaǵa qoldaý kórsetkeni úshin alǵys aıtty.
«Kıeli Taraz óńiri Qazaqstandaǵy din Islamnyń altyn besigi. Sebebi Taraz óńirinen kóptegen ǵalym-ǵulamalar shyqty. Onyń ishinde din ǵalymdary da boldy. Tarazdan túlep ushqan din qaıratkerleri ózge óńirlerge baryp, Islam dininiń qanatyn keń jaıýyna yqpal etti. Óner-ǵylymnyń, din men rýhanııattyń damýy úshin ter tókti. Búgingi konferentsııada osyndaı tarazdyq tulǵalardy kópshilikke dáripteýdi maqsat tuttyq. Ózge elderden, óz elimizdiń ár aımaǵynan kelgen ǵalymdarymyz baıandama jasap, tulǵalarymyzdy ulyqtady», – dep atap ótti.
Óz kezeginde Jambyl oblysynyń ákimi Nurjan Nurjigitov Bas múftıge oblys turǵyndarynyń ystyq yqylasy men sálemin jetkizip, qashan da qoldaý bildirip, el keleshegi úshin mańyzdy jumystardy birlesip atqarýǵa daıyn ekenin jetkizdi.
Basqosý sońynda taraptar din men dástúr sabaqtastyǵy, asyl dinimizdiń bedelin bıiktetý baǵytynda birqatar birlesken ıgi jobalardy júzege asyratyn bolyp ýaǵdalasty.
