Bas múftı jastardyń onlaın forýmyna qatysty (FOTO)
Búgin QMDB Tóraǵasy, Bas múftı Naýryzbaı qajy Taǵanulynyń qatysýymen «Jastar. Jańa dáýir. Jasampazdyq» atty onlaın forým ótti. ZOOM platformasy arqyly ótken sharany QMDB Jastar isi sektory uıymdastyrdy.
Forým aıasynda jastardy túrli jat ıdeologııalardyń arbaýynan saqtandyrý, rýhanı qundylyqtarymyzdy qasterleýge shaqyrý, olardyń zamanǵa saı bilim alyp, óz-ózin jetildirýge qulshynysyn arttyrý sekildi baǵyttar kózdeldi.
Jıynda alǵashqy bolyp sóz alǵan Bas múftı Naýryzbaı qajy Taǵanuly: «Paıǵambarymyz (oǵan Allanyń salaýaty men sálemi bolsyn) jastardyń ornyn erekshe baǵalaǵan. Bir hadısinde balalyǵyn baısaldylyqqa jeńdirip, aqyl toqtatyp, ımandylyq jolynda erte eseıgenderdi eń qaıyrly jas dep sıpattaıdy. Rıýaıat boıynsha Omar ıbn Hattab (r.a.) óziniń halıfalyǵy kezinde qandaı da bir qıyn másele sóz bolǵanda jastardan arnaıy pikir suraıdy eken. Óıtkeni olardyń oılary júırik, zerek bolady dep tujyrymdaǵan» deı kele, jastardyń bir jaǵadan bas, bir jeńnen qol shyǵaryp, jaman áreketterdi joıýǵa atsalysýy kerektigin atap ótti. Bul iste QMDB Jastar sektory jastarmen tize biriktirip, ortaq jobalardy birlesip júzege asyrýǵa daıyn ekenin jetkizdi.
Jıynǵa QMDB Tóraǵasynyń orynbasary, naıb múftı Ershat Ońǵarov moderatorlyq jasady. Shara barysynda Aqparat jáne qoǵamdyq damý mınıstrligi Jastar jáne otbasy isteri komıtetiniń tóraǵasy Shahmardan Baımanov, sportshy, erejesiz jekpe-jekten álem chempıony Ardaq Nazarov, Atyraý munaı jáne gaz ýnıversıtetiniń prorektory Oljas Súleımenov, QMDB Jastar isi sektorynyń meńgerýshisi Ádilet Kópen, Nur-Múbarak ýnıversıtetiniń doktoranty Syrym Shákızada baıandama jasady.
Jıyn sońynda usynys-pikirler tyńdalyp, jastarǵa arnalǵan úndeý jarııalandy. «Memlekettiń jarqyn bolashaǵy jastardyń bolmysy men sanasyna, mádenı damýyna, bilim men tájirıbe deńgeıine baılanysty. Sondyqtan qazirgi tańda elimizde jastardyń rýhanı-tanymdyq tárbıesin, jan-jaqty saýattylyǵyn arttyrýdyń mańyzy orasan. Osy baǵytta barshańyzdy eldiń erteńgi keleshegi úshin birigip is jasaýǵa shaqyramyz» delingen úndeýde.
