BAS MÚFTI JASTARMEN BIRGE AÝYZAShARǴA QATYSTY (FOTO)
Elordada Qazaqstan musylmandary dinı basqarmasy Ýaǵyz-nasıhat bólimine qarasty Jastar isi sektory jáne Áıel-qyzdar sektorynyń uıymdastyrýymen qaladaǵy jastar uıymdarynyń basshylaryna, meshit jastaryna, Quran jattaý ortalyǵynyń shákirtterine, sondaı-aq áıelder jáne qyzdar medresesiniń shákirtterine arnaıy aýyzashar berildi.
«Ramazan – meıirim aıy» ataýymen ótken rýhanı keshte QMDB Tóraǵasy, Bas múftı Naýryzbaı qajy Taǵanuly aýyzashar dastarqanynyń qadirli qonaqtaryn qasıetti aımen quttyqtap, izgi tilegin arnady.
«Jastar – eldiń bolashaǵy. Dinimiz Islam jastarǵa, jastyq shaqqa úlken mán beriledi. Ardaqty Paıǵambarymyzǵa (oǵan Allanyń salaýaty men sálemi bolsyn) alǵash ýahı túsken kezeńderde qasynda ıman keltirgen, seriktes bolǵan, eń alǵashqy aýyrtpalyqtardy qabyldaǵan sahabalardyń túgelge derligi jastar edi. Tipti Zýbaır ıbn Aýýam, Álıler on jasqa da tolmaǵan bala bolatyn. Sol kezdegi jasy úlken sahabalardyń biri Ábý Bákirdiń ózi nebári 38 jasta bolǵandyǵy aıtylady.
Qazaq dalasynda da talaı danyshpandar jas kezinde-aq ózderiniń kemeńgerligin kórsetken.
Ataqty Tóle bı on bes jasynda halyq arasynda bılik aıtqan. On alty jasynda aqyn atanyp, 27 jyl ǵana ǵumyr keshken Sultanmahmut Toraıǵyrov: osy qysqa ǵumyrynda sol kezdegi jastarǵa úlgi-ónege bola bildi.
Qarańǵy qazaq kógine
Órmelep shyǵyp, kún bolam,
Qarańǵylyqtyń kegine,
Kún bolmaǵanda, kim bolam?! – dep, jasynan-aq aldyna bıik maqsat qoıa bildi.
Qazaqstan musylmandary dinı basqarmasy jastar máselesin árdaıym nazarda ustap, olardyń tolyqqandy dinı bilim alýyna, meshit ımamdarymen turaqty qarym-qatynasta bolýlaryna múmkindikter jasap, tıisinshe qoldaý bildirip keledi.
Sonymen qatar bizderdiń áıel-qyzdar sektorynyń jumysy da Qazaqstan musylmandary dinı basqarmasynyń mańyzdy jumys baǵyttarynyń biri. «Otan otbasynan bastalady» deıtin bolsaq, ár otbasynyń baqytty bolýy, onyń saqtalyp qalýy áıel adamǵa kóp baılanysty. Erteńgi el basqarar býynnyń tárbıesi, qoǵamnyń bolashaǵy ananyń tárbıesimen tikeleı baılanysty.
Alla Taǵala qasıetti Qurannyń «Tahrım» súresinde Márııam anamyzdyń, Ásııa anamyzdyń taqýalyǵyn mysal etip, búkil musylman qaýymǵa úlgi etken. Halqymyzda da bir qolymen besigin terbetken, aqylymen alashty tebirentken dana analarymyz az bolmaǵan. Búgin ımandy aýrýlarymyz sol analarymyzdyń jalǵasy bolǵaı!» dedi Bas múftı.
Rýhanı keshte jastarǵa ýaǵyz aıtylyp, termeler oryndalyp, vıktorınalyq suraqtar qoıyldy. Suraqtarǵa durys jaýap bergenderge Astana qalasy «Áziret Sultan» meshiti jastarynyń atynan syılyqtar berildi.
Kesh sońynda qasıetti Quran aıattary oqylyp, Bas múftı keńesshisi Kenjetaı Baıkemeluly arnaıy duǵa jasady. Sondaı-aq Áıel-qyzdar sektory rýhanı keshke kelgen qonaqtarǵa arnaıy ramazan syıyn tabystady.
