BAS MÚFTIDIŃ QAZAQSTAN HALQYNYŃ BIRLIGI MEREKESIMEN QUTTYQTAÝY
Naýryzbaı qajy TAǴANULY,
QMDB Tóraǵasy, Bas múftı
Qadirli otandastar!
Barshańyzdy Qazaqstan halqynyń birligi merekesimen shyn júrekten quttyqtaımyn! Ár shańyraqqa shattyq, mol baqyt, myqty densaýlyq, birlik pen tatýlyq tileımin.
Búgingi tańda qoǵamda ózara súıispenshilik pen syılastyq, birlik pen qurmet syndy qundylyqtardy arttyrýdyń mańyzy erekshe. Óıtkeni, elimizdiń ıgiligi men birligine úles qosý – óz bolashaǵymyzǵa úles qosý.
Alla Taǵala qasıetti Quranda bizderge: «Allanyń jibinen myqtap ustańdar, ajyrap bólinbeńder» («Álı-Imran» súresi, 103-aıat), – dep buıyrsa, al ardaqty Paıǵambarymyz Muhammed (oǵan Allanyń salaýaty men sálemi bol): «Men ortalaryńnan ketkennen keıin baıaǵy bitpeıtin urys-keriske, daý-damaıǵa qaıta boı aldyrmańdar», – dep qashan da birlik týy astynda bolýdy ósıet etken.
Ózderińizge belgili, jýyrda Memleket basshysy Qasym-Jomart Toqaev Qazaqstan halqy Assambleıasynyń «Ádiletti Qazaqstan: birlik, turaqtylyq, damý» atty HHHII sessııasynyń otyrysynda: «Halqymyzdyń yntymaq-birligi bul – taǵdyrdyń bere salǵan syıy emes. Bul – eń aldymen, jurtymyzdyń kúndelikti tabandy eńbeginiń arqasy ekenin durys túsinýimiz kerek. Sondyqtan biz birligimizdi kún saıyn nyǵaıtyp otyrýymyz qajet. Iaǵnı tatýlyq pen kelisim halqymyzdyń ómir saltyna aınalýǵa tıis. Áıtpese, eldikti saqtap qalýymyz óte qıyn bolady. Jaqsy tilek aıtý – halqymyzdyń qanyna sińgen qasıet. «Jaqsy sóz – jarym yrys» dep beker aıtylmaǵan» degen bolatyn.
Osy rette barshańyzdy jaqsy sóz aıtyp, ózara baýyrmal bolýǵa shaqyramyn. Jaratýshy Jabbar Iemiz halqymyzdyń birligi men yntymaǵyn baıandy etkeı. Birligimiz bekem bolǵaı. Ámın
