Bas múftıdiń tóraǵalyǵymen Qurban aıtqa daıyndyq jumystary pysyqtaldy (FOTO)
Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń tóraǵalyǵymen onlaın jınalys ótti. Jıynǵa naıb múftı Ershat Aǵybaıuly, apparat basshysy Ǵylymbek Jádigeruly, bólim basshylary men oblys ımamdary qatysty.
Onlaın jıyn negizinen úsh ózekti máselege arnaldy. Onyń birinshisi QURBAN2020.KZ saıty arqyly tapsyrystardy qabyldaý jáne halyqqa keńinen túsindirý jumystaryn júrgizý.
Keıin Bas múftı qasaphanalardyń jumysyna toqtaldy. Oblys ımamdaryna qasapshylardyń jetkilikti deńgeıde bolýyn qadaǵalap, sanıtarlyq talapty barynsha saqtaýǵa mán berý qajettigin basa aıtty.
«Óte jaýapty, salmaqty sharýany moınymyzǵa alyp otyrmyz. Nıet etip qarajatyn tólegen azamattardyń amanatyna adal bolýymyz kerek. Etke zárý jandardyń da tilegi eskerilsin. Biz bul isti saýap alý maqsatynda uıymdastyryp otyrmyz. Memleket karantın rejımine qaramastan Dinı basqarmaǵa osy rásimniń ótýine ońtaıly jaǵdaılar jasaýda. Sondyqtan ıgi iste aıanyp qalmaıyq. Islam – meıirim dini. Biz ımamdar osy sharany da meıirimmen atqaraıyq» - dedi Naýryzbaı qajy Taǵanuly.
Jıynda Dinı basqarma tóraǵasy jańadan iske qosylǵan saıttyń Qurban aıt bitkenshe toqtaýsyz ári ashyq jumys isteýin qadaǵalaýdy tapsyrdy. Odan bólek Qurbandyq shalý rásimin atqarýǵa jalǵyz quzyrly mekeme retinde múftııattyń nasıhat jumystary halyqqa jetýin, el osy bir ortalyqtan tapsyrys berýin túsindirýdi jan-jaqty qolǵa alý qajettigine toqtaldy.
Qurbandyq shalý rásimin respýblıka boıynsha uıymdastyrýǵa jaýapty Zeket qorynyń dırektory Talǵat Omarovtyń aıtýynsha qazirgi ýaqytta barlyq aımaqta qasaphanalar daıyn ári sanıtarlyq talapqa saı. Muqtajdardyń tizimi bergen ótinishine saı ári biz bekitken tártip boıynsha iriktelip jatyr dedi qor dırektory.
Jıyn sońynda Bas múftı saýapty amaldy óz deńgeıinde uıymdastyryp, karantın talaptaryna asa mán berýdi tapsyrdy.
