Bas múftıge Qurban aıttyń qorytyndy esebin baıandady (FOTO)
Búgin elordada Bas múftı Naýryzbaı qajy Taǵanulynyń tóraǵalyǵymen 2022 jyldyń Qurban aıt merekesin qorytyndylaý jıyny ótti.
Ulyq merekeni qorytyndylaýǵa arnalǵan jıynǵa Dinı basqarmada qurylǵan jumys toby men oblys bas ımamdary qatysty.
QMDB Tóraǵasy aldymen din qyzmetkerlerin Qurban aıtpen quttyqtap, mereke kúnderi damylsyz qyzmet etken respýblıkalyq shtab múshelerine, óńirlerdegi barsha ımamdar men meshit jamaǵatyna, eriktilerge alǵysyn jetkizdi.
«Sizderdiń árqaısyńyz ulyq merekeni oıdaǵydaı ótkizýge atsalystyńyzdar. Qurban aıtta Haq Taǵalaǵa qulshylyq, halyqqa qyzmet ettińizder. Osy oraıda qurban shalýdy onlaın jáne oflaın formatta júzege asyrýǵa járdemdesken Aqparat jáne qoǵamdyq damý mınıstrligi, Tsıfrlyq damý, ınnovatsııalar jáne aEroǵarysh ónerkásibi mınıstrligi, oblystyq, jergilikti ákimder men mal baǵasyn sharyqtatpaı, halyqtyń qaltasyna aýyrlyq salmaǵan kásipkerlerge de, sonymen birge memlekettik jáne BAQ ókilderine rızashylyǵymdy bildiremin. Barshańyzǵa Alla razy bolsyn», – dedi Naýryzbaı qajy Taǵanuly.
Jıyn barysynda «Zeket jáne qaıyrymdylyq» qorynyń dırektory Qanat Qydyrmın men Aqparat bóliminiń meńgerýshisi Aǵabek Qonarbaıuly baıandama jasap, jumys esebin nazarǵa usyndy. Qanat Qoıanbekuly bıylǵy Qurban aıtta aýyz toltyryp aıtarlyqtaı aýqymdy jobalardyń qolǵa alynǵanyn, onyń birnesheýine Bas múftı arnaıy qatysqanyn atap ótip, mereke kúnderi qurban eti 129 040 otbasyǵa taratylǵanyn málimdedi.
Al aqparat salasy boıynsha esep bergen Aǵabek Qonarbaıuly bólim qyzmetkerleri Qurban aıttyń tek mereke kúnderi ári Dinı basqarmaǵa qarasty ǵana emes, memlekettik, táýelsiz buqaralyq aqparat quraldarynda nasıhattalýyna atsalysqanyn tilge tıek etti.
«Zulhıjja aıy bastalǵan kúni Bas múftı Naýryzbaı qajy Taǵanuly jýrnalısterge brıfıng ótkizip, Qurban aıt kúnderin jarııalady. Osydan bastap bólim qyzmetkerleri kúsheıtilgen rejımde jumys istep, resmı saıtty da, áleýmettik jelilerdegi paraqshalardy, messendjerlerdi belsendi túrde júrgizip otyrdy. Sonymen qatar QMDB Tóraǵasy Qazaqstan ulttyq telearnasyna tikeleı Efırde suhbat berse, Egemen Qazaqstan gazetine kólemdi suhbaty jarııalandy. Saıt, portaldarǵa 50-ge jýyq aqparat shyqty. «Munara TV» arnasy qurban aıtqa oraı stýdııalyq baǵdarlama túsirip, kórermenge usynsa, Múftııat saıtynyń táýliktik kórilimi 13 myńnan 55 myńǵa deıin kóterildi» dedi ol.
Jıyn sońynda QMDB Tóraǵasy Naýryzbaı qajy Taǵanuly din qyzmetkerlerine qurban aıtqa qatysty jáne ózge de baǵyttaǵy jumystardy jetildirý qajettigin aıtyp, tıisti tapsyrmalar berdi.
