Bes kún boıy tegin as beretin «Ýaqyp» ashanasy ashyldy (FOTO)
Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz hazrettiń qaıyrymdylyqqa úndeýge qatysty bastamasyna oraı, Almaty qalasy Ortalyq meshiti jáne qoly ashyq azamattardyń uıytqy bolýymen «ÝAQYP» ashanasy ashyldy.
Saltanatty sharaǵa QMDB-nyń Almaty qalasy boıynsha ókili Erkinbek qarı Kerimbekuly, Almaty qalasy Din isteri jónindegi basqarmasynyń basshysy Aıdar Esenbekov jáne basqa da aıtýly azamattar qatysty. Olar ıgilikti iske sáttilik tilep, quttyqtaý sóz sóıledi.
Negizinen, bul ıgi bastamanyń maqsaty – meshitke kelgen árbir jaǵdaıy tómen, jalǵyzbasty analar men jetim-jesirlerdiń, múgedekter men músápirlerdiń az da bolsyn muńyn seıiltip, muqtajdyǵyn ótep, jarqyn ómirge úmit syılaý.
«ÝAQYP» ashanasy jyl boıy ár aptanyń bes kúninde jumys isteıdi. Munda áleýmettik az qamtylǵan 100-120 adamǵa úsh mezgil tegin tamaq beriledi. Kelgen qonaqtarǵa arnaýly bekitilgen 7-8 adam árdaıym sapaly qyzmet kórsetýge ázir. Sondaı-aq, kúnine bir kirgen adam qaıta kirý múmkindigine ıe. Kelýshiler ashanaǵa Almaty Ortalyq meshiti janyndaǵy «Ihlas» qaıyrymdylyq qaýymdastyǵynan alynǵan arnaıy talondary arqyly ǵana kire alady.
«Oń qolyń bergen sadaqany sol qolyń bilmesin» degen Paıǵambaryn hadısi ómirlik ustanymyna aınalyp, óz attarynyń atalmaýyn ósıet etken kásipker azamattarymyzǵa Alla razy bolsyn deımiz.Mundaı ıgi bastamalar kópke úlgi bolyp, odan ári jalǵasyn taba bersin degen nıet bildiremiz.
Ashana Seıfýllın dańǵyly №330, Radıshev kóshesiniń qıylysyndaǵy meken jaıda ashyldy. Qosymsha aqparat úshin: tel.: 8 778 100 3939; 8 708 213 7023; 8 775 719 9957
