Bilim men hıkmet – úlken nyǵmet
Qadirli baýyrlar!
Asyl dinimiz Islamda paıdaly bilim alýdyń máni erekshe. Tipti, musylman er men áıelge bilim alý – paryz. Dinimizde bilim alýdyń mańyzy joǵary bolsa, hıkmetti, ıaǵnı danalyq ilimin úırenýdiń de orny aıryqsha.
Paıǵambarymyz Muhammed (oǵan Allanyń salaýaty men sálemi bolsyn) bir hadısinde: «Bilim men hıkmet musylmandardyń joǵaltqan qazynasy, qaı jerden tapsa da ıemdenip alsyn», – degen.
Bilim men hıkmet – úlken nyǵmet. Bul hadısten osy nyǵmetti ıemdenip alýǵa eń áýeli musylman balasy laıyqtyraq ekenin ańǵaramyz. Rasynda qaı kezeńde, qaı qoǵamda bolsyn, óz dinin, tilin, tarıhyn, mádenıeti men ádebıetin bilgen, sonymen qatar shet tilderin meńgergen, oılaý deńgeıi joǵary tulǵalar qashan da kóshbasshy bolǵan. Olar qoǵamnyń úlgi alar tulǵasyna aınalǵan.
Alla Taǵala bilim men hıkmet ilimin úırengen pendesiniń dárejesin arttyrady. Qasıetti kitabymyz Quranda: «Alla senderdiń aralaryńnan ıman keltirgender men bilim ıelerin joǵary dárejelerge kóteredi» («Mújádálá» súresi, 11-aıat) delingen.
Biz ımamdar forýmynda qabyldanǵan «Búgingi musylmannyń kelbeti» qujatynda, «Jeti rýhanı qazyq» Tuǵyrnamasynda bilim alýdyń mańyzyn aıryqsha atap óttik. Jeti rýhanı qazyqtyń bir ustyny retinde bilim alýdy bekittik.
Rasynda búgingi, ıaǵnı HHI ǵasyrdyń musylman qaýymy bilimmen qatar danalyq ilimin boıyna sińirip, qoǵamdy izgilik pen birlikke bastaýshy tulǵalarǵa aınalýy tıis. Óıtkeni, qazirgi zamanǵa asa qajetti qundylyqtar – tereń bilim, kórkem minez, dindi ustanýdaǵy danalyq, birlik, ultjandylyq, el ıgiligi jolyndaǵy janashyrlyq qyzmet, t.b.
Órkenıetke qadam basqan búgingi kezeńdegi basty qýat – bilimde. Alash aǵartýshysy Ahmet Baıtursynuly: «Bilim – bir qural. Bilimi kóp adam quraly saı usta ispetti, ne istese de kelistirip isteıdi» deıdi.
Bilimdi adam óz ortasynan oq boıy ozyp, eline, jerine, ultyna, dinine aıanbaı qyzmet etedi. Alǵan bilimdi halyq ıgiligine jumsaý – saýaby mol amaldyń biri. Kózi ashyq azamattar ár salada kósh bastap, eldiń kósegesin kógerteri haq. El qamyn oılaǵan adam úshin halyqtyń bolashaǵy qashan da uly murat bolyp qala beredi.
Biz óz urpaǵymyzdy bilimge baýlýmen qatar, tárbıesin de túzep otyrýymyz kerek. Bul – ata-anadan bastap, jas urpaqtyń bilimi men tárbıesine alańdaǵan barlyq azamatqa ortaq jaýapkershilik.
Qurmetti qaýym!
Sizderdi, barsha ustazdar men shákirtterdi bilim kúnimen shyn júrekten quttyqtaımyn! Alla Taǵala otbasylaryńyzǵa amandyq, denderińizge saýlyq, saýaby mol qyzmetterińizdiń jemisin kórýdi násip etkeı!
Jaratýshy Jabbar Iemiz siz ben bizge paıdaly bilim men hıkmet násip etip, soǵan saı amal etýdi jazǵaı! Haq Taǵala elimiz ben jerimizdiń amandyǵy men bolashaǵy jolynda qyzmet etip júrgen jandarǵa jar bolǵaı! Ámın!
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı
