Birligimiz baıandy bolǵaı!
Sizderdi Qazaqstan halqynyń birligi merekesimen shyn júrekten quttyqtaımyn! Ár otbasyǵa baqyt pen bereke, birlik pen tatýlyq tileımin.
Imandylyqtyń altyn uıasy bolǵan asyl dinimiz Islam adamzatty beıbitshilikke úndep, birlikke shaqyrady. Alla Taǵala Quranda: «Barlyǵyń Allanyń jibinen ustanyp, ózara top-topqa bólinbeńder» («Álı Imran» súresi, 103-aıat) dep eskertedi. Al ardaqty Paıǵambarymyz Muhammed (oǵan Allanyń sálemi men salaýaty bolsyn): «Múminder kirpishterden qalanǵan bir ǵımarat ispettes» dep birlik pen yntymaqtyń mańyzyn baıandaıdy.
Rasynda, birlik pen beıbitshilik basty qundylyqtarymyzdyń biri. Biz jyl basynda dinı qyzmet aıasynda ımamdar úshin 2022 jyldy «Islam – yntymaq pen birlik dini» jyly dep jarııaladyq. Bul bastama elimizdiń turaqtylyǵy men tynyshtyǵyn nyǵaıtýǵa oń yqpal etip keledi.
Qazirgi álemdegi kún saıyn qubylǵan ustanymdar men turaqsyzdyq qazaq halqynyń: «Kúshengen jeńbeıdi, kúshi kóp jeńedi» degen maqalynyń ómirsheńdigin dáleldedi. Rasynda, halqymyz aıtqandaı, «Birligi bar eldiń belin eshkim syndyrmas».
Alla Taǵala halqymyzǵa amandyq, jurtymyzǵa tynyshtyq, birligimiz ben beıbitshiligimizdi, táýelsizdigimizdi baıandy etkeı. Ámın!
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı
