Bıyl sheteldikterge umra jasaýǵa ruqsat joq
Saýd Arabııasynyń baspasóz agenttigi (SPA) habarlaǵandaı, SAK bıligi óz azamattaryna koroldikten shyǵýǵa jáne qaıta kirýge 2021 jyldyń 1 qańtarynan bastap ruqsat beredi. 2021 jyldyń 1 qańtarynan keıin qurlyq, teńiz jáne áýe porttary arqyly kez kelgen kólikpen shyǵý jáne oralý úshin barlyq shekteýler koronavırýsqa qatysty saqtyq sharalaryn saqtaı otyryp alynyp tastalady.
Sonymen qatar, Saýd Arabııasynyń bıligi umrany birtindep jalǵastyrý josparynyń jasalynyp jatqandyǵyn da habarlady.
Saýd Arabııa úkimeti karantınge baılanysty shekteýlerdi alyp tastaýdyń naqty ýaqytyn belgilep, umrany jalǵastyrýǵa sheshim qabyldaǵan jaǵdaıda aldyn ala 30 kún buryn jalpyǵa jarııalanatyndyǵyn jetkizdi.
Al, 15 qyrkúıekten bastap Parsy shyǵanaǵy yntymaqtastyq keńesiniń (GCC) barlyq tólqujat ıeleri men jaramdy vıza ıelerine qaýipsizdik sharalaryn saqtaı otyryp, koroldikten emin-erkin ketip, jumysqa turýyna nemese qaıta oralýyna ruqsat berilgen bolatyn. Saýd Arabııasyna kirýdiń negizgi talaby – sertıfıkattalǵan zerthanalarda 48 saǵat buryn tapsyrylǵan synama qorytyndysy.
Budan aldyn habarlaǵandaı, Saýd Arabııa bıligi osy jyldyń naýryz aıynyń basynan bastap barlyq halyqaralyq saparlarǵa tyıym salǵan edi. Mamyr aıynyń sońynda el úkimeti shekteýlerdi birtindep jeńildete bastady, biraq, barlyq halyqaralyq reısterge salynǵan tyıymdar áli de óz kúshinde. Sońǵy málimetterge sáıkes, Saýd Arabııasynda koronavırýs indetin juqtyrǵandar sany 325 myńnan asyp, 4268 adam qaıtys boldy.
