Depýtattar Dinı basqarmamen birlesip qaıyrymdylyq sharasyn uıymdastyrdy (FOTO)
Búgin, qasıetti Qurban aıt merekesiniń alǵashqy kúni Parlament depýtattary QMDB-men birlesip birqatar ıgi bastamany qolǵa aldy. Senat Tóraǵasy Máýlen Áshimbaev bastaǵan depýtattar elordamyzdaǵy «Green TAL Food» áleýmettik dámhanasyna baryp, qaıyrymdylyq sharasyn uıymdastyrdy.
«Bul jerde taǵdyrdyń túrli synaǵyna tap bolǵan jandar jumys isteıdi. Dámhana qyzmetkerlerin aıt merekesimen quttyqtap, olarǵa qurbandyqtyń eti salynǵan azyq-túlik qorjynyn tartý ettik. Jalpy sońǵy jyldary elimizde áleýmettik kásipkerlik jandanyp kele jatqanyn baıqaýǵa bolady. Kásiptiń bul túri Memleket basshysynyń da basty nazarynda. Bıylǵy aqpanda Prezıdentimiz áleýmettik kásipkerlermen kezdesip, mundaı ıgilikti istiń qoǵam úshin mańyzy zor ekenin aıtty. Sondyqtan aldaǵy ýaqytta osy baǵytta tyń bastamalar qolǵa alynady dep senemiz» dep atap ótti Máýlen Áshimbaev.
Sondaı-aq Senat Tóraǵasy Qurban aıt qarsańynda depýtattardyń bastamasymen medıtsınalyq qyzmetkerlerdi qoldaýǵa arnalǵan aktsııa uıymdastyrylǵanyn atap ótti. Senat apparaty juqpaly indetpen kúrestiń aldyńǵy shebinde júrgen dárigerdiń úıine baryp, syı-sııapattar tabys etti.
«Depýtattarymyz bıylǵy Qurban aıtty muqtaj jandarǵa, pandemııa kezinde óz isine adaldyq tanytqan medıtsına qyzmetkerlerine kórsetý arqyly atap ótýde. Árdaıym osylaı bir-birimizge jaqsylyq jasap, qol ushyn sozsaq, kez kelgen synnan súrinbeı ótetinimizge kúmán joq. Sondyqtan yrys-yntymaǵymyzdan ajyramaıyq. Barshańyzdy qasıetti merekemen quttyqtaı otyryp, nıetterińiz qabyl bolsyn dep tileımin» dedi Máýlen Áshimbaev.
