DIN QYZMETKERLERI ARASYNDA FÝTBOLDAN TÝRNIR ÓTTI (FOTO)
Elordada Qazaqstan musylmandary dinı basqarmasynyń uıymdastyrýymen din qyzmetkerleri arasynda shaǵyn fýtboldan týrnır ótti.
«Astana-Arena» stadıonynda ótken dop dodasyna Dinı basqarma qyzmetkerleri men oblystyq ókildikterdiń bas ımamdarynan quralǵan 6 komanda qatysty.
«Jyl saıyn dástúrli túrde ótkizip turatyn joldastyq týrnırdiń maqsaty – din qyzmetkerleri arasynda birlik pen baýyrmaldyqty arttyrý, sol arqyly el men jerge qyzmet etý. Sondaı-aq qoǵamǵa jáne din qyzmetkerleri arasynda salaýatty ómir saltyn ustanýdy nasıhattaý. Óıtkeni táni myqty musylman saýapty isterge uıytqy bolady, jaqsylyqtyń jarshysy bola alady» dedi Bas múftı Naýryzbaı qajy Taǵanuly.
Qyzyqty ári tartysty ótken oıyn nátıjesinde «Baıanaýyl» komandasy jeńimpaz atansa, «Oqjetpes» komandasy 2-oryn, «Altaı» komandasy 3-oryndy enshiledi. Sondaı-aq úzdik atanǵan oıynshylar jekeleı nomınatsııalarymen marapattaldy.
