DIN QYZMETKERLERINE ARNALǴAN SEMINAR-TRENING ÓTTI
Búgin Astanada Qazaqstan musylmandary dinı basqarmasynyń uıymdastyrýymen din qyzmetkerlerine arnalǵan semınar-trenıng ótti.
Semınar barysynda birqatar ózekti taqyryptar qamtyldy. Atap aıtqanda, QMDB Tóraǵasynyń orynbasary, Naıb múftı Sansyzbaı Shoqanov «Islam jáne qazaq qundylyqtarynyń araqatynasy» taqyrybynda baıandama jasap, dástúrli rýhanı mura men ıslam iliminiń sabaqtastyǵyna toqtaldy.
Qazaqstan Respýblıkasy Mádenıet jáne aqparat mınıstrligi Din isteri komıteti tóraǵasynyń orynbasary Maqsat Aralbaıuly «Memleket pen din araqatynasy: jahandyq tendentsııalar jáne zaıyrlylyq qaǵıdaty» taqyrybynda baıandama jasap, qazirgi álemdegi din men memleket qatynasynyń damý baǵyttaryn jáne zaıyrly qoǵamdaǵy dinı qyzmettiń mańyzyn atap ótti.
Sonymen qatar, Bas múftı keńesshisi Smaıyl Seıtbekov «QMDB qurylymy jáne qyzmet Etıkasy» taqyrybynda baıandama jasap, dinı qyzmetkerlerdiń jaýapkershiligi men Etıkalyq ustanymdaryna keńinen toqtaldy.
Semınardyń taǵy bir mańyzdy bólimi jasandy ıntellekt múmkindikterine arnaldy. Bul taqyrypta QMDB Tsıfrlyq damý bóliminiń meńgerýshisi Tımýr Orynhanov baıandama jasap, tsıfrlyq tehnologııalar men jasandy ıntellekttiń dinı-aǵartý salasyndaǵy qoldanylý áleýetin tanystyrdy.
Atalǵan semınar din qyzmetkerleriniń kásibı deńgeıin arttyrýǵa, dinı qyzmetti zamanaýı talaptarǵa saı júrgizýge jáne qoǵammen tıimdi baılanys ornatýǵa baǵyttalǵan.
/
