Dinı basqarma Almatyda jamaǵatqa aýyzashar berdi (FOTO)
Qazaqstan musylmandary dinı basqarmasynyń uıymdastyrýymen Almatyda kópshilikke aýyzashar berildi.
Igi shara Quran oqýmen bastalYP, QMDB Tóraǵasy, Naýryzbaı qajy Taǵanuly ómirden ótken marqumdardyń rýhyna duǵa baǵyshtady.
Aqsaqaldar men aqjaýlyqty ájeler, zııaly qaýym ókilderi, óner men mádenıet qaıratkerleri, sondaı-aq múmkindigi shekteýli jandar men belsendi jastar qurmetti qonaq bolǵan aýyzashar dastarqanynda Bas múftı jamaǵatqa izgi tilegin bildirip, qasıetti Ramazan aıymen quttyqtady.
«Ramazan aıyndaǵy qulshylyq-ǵıbadattaryńyzdy, duǵa-tilekterińizdi qabyl etsin! Barshańyzdy kúlli musylman balasy asyǵa kútetin qasıetti Ramazan aıymen shyn júrekten quttyqtaımyn! Ár shańyraqqa baqyt pen bereke, myqty densaýlyq tileımin!
Alla Taǵala qasıetti Qurannyń «Sharh» súresinde: «Shyn máninde qıyndyqpen birge jeńildik bar» deıdi. Mine, búginde qasıetti Ramazan aıynda jamaǵatpen aýyz ashyp, kópshilikpen birge qulshylyq jasaýǵa múmkindik aldyq. Osy kúnge jetkizgen jáne osyndaı uly múmkindikti násip etken Jaratýshy Jabbar Iemizge sansyz shúkirler aıtamyz.
Ramazan – tárbıe men taǵylym aıy. Qasıetti aıda musylman balasy qanaǵat, shúkir, meıirim, baýyrmaldyq, keshirim syndy kórkem minezdi qalyptastyrýǵa tyrysady. Óıtkeni, qasıetti aıda musylmanǵa kóp jaqsylyq pen múmkindikter beriledi. Bul týraly ardaqty Paıǵambarymyz Muhammed (oǵan Allanyń salaýaty men sálemi bolsyn): «Bul aıda jánnat esikteri ashylady. Oraza tutqan adamnyń aldyńǵy jáne keıingi kúnálary keshiriledi», – degen súıinshi habar jetkizgen.
Endeshe, berekeli aıda kóbirek saýapty amal jasaýǵa asyǵaıyq. Ata-anamyzdyń, qazynaly qarttarymyzdyń duǵasy men alǵysyn alýǵa tyrysaıyq. Múmkindikke qaraı muqtaj jandarǵa qol ushyn berip, naýqastyń kóńilin surap, saýap alaıyq» dedi QMDB Tóraǵasy.
Sondaı-aq Bas múftı barsha musylman qaýymynyń tutqan orazasy, jasaǵan izgi amaldary qabyl bolýyn surap, jamaǵatpen birge duǵa jasady. Al sóz kezegin alǵan aqsaqaldar men zııaly qaýym ókilderi Bas múftıge alǵys bildirip, Dinı basqarmanyń ıgi bastamalaryna sáttilik tiledi.
Aýyzashar dastarqanynda ıláhı ánder men termeler oryndalyp, jas talanttardan quralǵan «Attıla» toby jarapazan jyryn aıtty.
