DINI BASQARMADA JAŃA TAǴAIYNDAÝLAR BOLDY (FOTO)

Búgin Astana qalasynda Qazaqstan musylmandary dinı basqarmasy ǵımaratynda Bas múftı Naýryzbaı qajy Taǵanulynyń tóraǵalyǵymen kezekti apparat jınalysy ótti.

Bas múftı Dinı basqarma ujymyna osyǵan deıin Ǵalamtarmen jumys sektoryna jetekshilik etken Serikbol Hasandy múftııattyń «Munara» gazetimen qosa «Iman» jýrnalyna bas redaktor etip, al Aqparat bóliminiń mamany Erkin Shákirulyn «Munara TV» telearnasynyń dırektory qyzmetine taǵaıyndaý týraly sheshim qabyldaǵanyn jetkizdi. 

«Sizder buǵan deıin Dinı basqarmanyń aqparat salasynda birneshe jyl qyzmet ettińizder. Osy salada jınaqtaǵan tájirıbelerińizdi múftııattyń medııasyn damytýǵa jumsaısyzdar degen senimdemin. Alla Taǵala jańa qyzmetterińizge bereke násip etsin» dedi Bas múftı Naýryzbaı qajy Taǵanuly.

Sondaı-aq osyǵan deıin «Munara TV» telearnasynyń dırektory qyzmetin atqarǵan Nurjan Talasuly arna basshysynyń keńesshisi bolyp taǵaıyndaldy. QMDB Tóraǵasy Nurjan Talasulyna medıa salasyndaǵy eńbegi úshin alǵysyn bildirdi.