Dinı basqarmaǵa qarasty toǵyz medrese kitaptary tekserildi
QMDB Dinı saraptama bóliminiń Astana, Almaty, Shymkent jáne oblystardaǵy ókilderi elimizdegi 9 medrese-kolledj kitaphanalary men oqý zaldaryndaǵy dinı ádebıetterge tekserý jumystaryn júrgizdi.
Is-sharanyń negizgi maqsaty – medreselerde tálim alyp jatqan shákirtterge mazmuny durys, baǵyty aıqyn kitaptardy jetkizý.
«Astana», «Ábý Hanıfa», «Shymkent», «Aqtóbe», «Saryaǵash», «Úshqońyr», «Oral», «Hıbatýlla Tarazı» jáne «Ábý Bákir Syddyq» medrese-kolledjderinde eki kúnge sozylǵan saraptama jumystary nátıjesinde 48 221 dinı ádebıet tekserildi.
Dinı saraptama bóliminiń meńgerýshisi Nurlan Qaıyrbekovtyń aıtýynsha, mundaı tekserý jumystary ár toqsan saıyn ótkizilip turady.
«Elimizdegi dinı bilim oryndarynda oqý baǵdarlamasyna saı oqytylatyn kitap qory jyl sanap ulǵaıyp keledi. Bizdiń mindetimiz – memlekettiń tutastyǵyna kirbiń túsiretin, Qazaqstan musylmandary dinı basqarmasynyń ustanymyna qaıshy keletin dinı eńbekterdiń osyndaı oqý oshaqtarynda taralýyna jol bermeý. Osy maqsatta QMDB-ǵa qarasty oqý oryndary men medreselerdegi kitaptardy tekseristen ótkizdik» dep atap ótti bólim meńgerýshisi.
