Dinı ońaltý baǵytynda semınar ótti (FOTO)
QMDB Dinı ońaltý bóliminiń meńgerýshisi, ıslamtanýshy Hasan Amanqul arnaıy is-saparmen Pavlodar oblysyna bardy.
Aldymen Hasan Tashaıuly Pavlodar qalasy mańynda ornalasqan Ap-162/1 túzetý mekemesinde bolyp, jat aǵym jetegine erip shalys basyp, jazasyn ótep jatqan birneshe adammen jeke kezdesý ótkizdi.
Odan keıin oblystyq «Máshhúr Júsip» ortalyq meshitinde óńir ımamdarymen kezdesip, dinı ońaltý jumysyna jaýapty mamandarǵa semınar ótkizdi. Semınarda jat aǵym qatarynda júrgen azamattarmen suhbat qurý, tıimdi jumys atqarý jaıly pysyqtaldy.
«Imamdardyń qyzmetiniń eń basty baǵyttarynyń biri – meshitke kelýshi jamaǵattyń aýyzbirshiligin saqtaý, elimizdiń, halqymyzdyń beıbit ómir súrýi úshin aıanbaı eńbek etý» dedi bólim meńgerýshisi.
Sondaı-aq dinı ońaltý jumysynda jeke kezdesýdiń mańyzdylyǵy týraly aıtyldy. Hasan Tashaıuly semınar sońynda ımamdar qoıǵan kóptegen suraqqa tushymdy jaýap berdi.
