DINI RÁSIMDER BÓLIMI AShYLADY
Qazaqstan musylmandary dinı basqarmasynan Dinı rásimder bólimi ashylady. Bul týraly QMDB Tóraǵasy, Bas múftı Naýryzbaı qajy Taǵanuly 2026 jylǵa arnalǵan Baǵdarlyq baıandamasynda málimdedi.
«Elimizdiń ár aımaǵynda dinı rásimderdi oryndaý, halyqqa birizdi baǵyt berý maqsatynda Qazaqstan musylmandary dinı basqarmasynan «Dinı rásimder» bólimin ashý týraly sheshim qabyldadym.
Shyn máninde, dinı rásimder tek qulshylyq emes, sonymen qatar qoǵamdyq tárbıe quraly. Árbir dinı rásim musylmandy sabyrlyqqa, jaýapkershilikke, únemshildikke, ózara qurmet syndy qundylyqtarǵa tárbıeleıdi. Alaıda bul salada durys baǵyt berilmese, atalǵan rásimder, kerisinshe qoǵamǵa salmaq salatyn daýly máselege aınalýy múmkin.
Jańadan ashylatyn Dinı rásimder bólimi janaza, jerleý jáne as berý, neke qııý, balaǵa at qoıý, Quran baǵyshtaý rásimderin durys atqarylýyn jáne juma, aıt, taraýyq sekildi jamaǵatpen oqylatyn namazdardyń bir tártippen oryndalýyn júıeleıtin bolady», – dedi Bas múftı.
