Elimizde Qurban aıt meıramy bastaldy (FOTO)

Búgin elimizde kúlli musylmannyń ulyq merekesi – Qurban aıt bastaldy.

QMDB Tóraǵasy, Bas múftı Naýryzbaı qajy Taǵanuly elordadaǵy respýblıkalyq «Áziret Sultan» meshitinde ýaǵyz aıtyp, jamaǵatpen birge aıt namazyn oqydy.

Bas múftı: «Qasıetti Qurban aıt – musylman jurtshylyǵynyń ulyq merekesi. Aıt – sózi «ál-ǵıdý» sózinen shyǵyp, mereke, meıram, qýanysh degen maǵynalardy bildiredi. Qasıetti Qurban aıt kúni musylman adam aıt namazyn oqyp, qurban shalyp, aıt merekesimen ózgelerdi quttyqtap, qaıyrymdy ister atqarýǵa tyrysady. Bul kúnderdi ulyqtap, adamdarǵa qýanyshty kóńil-kúı syılaý – taqýalyq belgilerinen», – dep, ulyq meıramnyń ádepterine jeke-jeke toqtaldy.

Elimizdegi záýlim meshitke jınalǵan jamaǵat Bas múftımen birge eldiń amandyǵy, tynyshtyǵy úshin duǵa tilep, qurban shalýǵa nıettendi. Budan keıin QMDB Tóraǵasy meshit aýlasynda uıymdastyrylǵan qaıyrymdylyq jármeńkesi men sporttyq sharalarǵa kýá boldy. Sondaı-aq kıiz úıde arnaıy jaıylǵan dastarqannan dám tatyp, batasyn berdi.

Aıta keteıik, Qazaqstan musylmandary dinı basqarmasyna qarasty barlyq meshitte aıt namazy oqylyp, merekelik is-sharalar bastalyp ketti.