ELORDA IMAMDARY «DARHAN DALA» JOBASY AIaSYNDA SAMARQANǴA BARDY (FOTO)
Astana qalasynyń Bas ımamy Erbolat Júsipov bastaǵan bir top din qyzmetkerleri «Darhan dala» jobasy aıasynda kórshiles Ózbekstan Respýblıkasyna arnaıy sapar shekti.
Rýhanı saıahat barysynda olar Islam órkenıetiniń altyn besigi sanalatyn Samarqan qalasyndaǵy qasıetti oryndardy zııarat etti. Imamdar aldymen kúlli musylman álemine tanymal hadıs ǵalymy Imam ál-Buharı kesenesi men Qazybekuly Jabaı áýlıeniń kesenesine baryp, Quran baǵyshtap, duǵa jasady. Odan keıin tarıh pen taǵylym toǵysqan Gúr-Ámir kesenesine aıaldap, kóne shahardyń rýhanı kelbetimen tanysty. Sapar barysynda Samarqannyń basty nyshany — Regıstan alańyndaǵy Sherdor, Tillá-Qarı jáne Ulyqbek medreselerin aralap, ǵasyrlar boıy saqtalyp kelgen sáýlet óneriniń ozyq úlgilerin tamashalady.
Budan bólek, din qyzmetkerleri Ulyqbek observatorııasy men Hazrat Hızr meshitine baryp, Samarqannyń tereń tarıhı-rýhanı murasymen jaqyn tanysty. Sapardyń sońynda olar Bıbi-Hanym meshitinde bolyp, elimizdiń amandyǵy men musylman úmmetiniń birligi úshin duǵa jasady.
Источник: Aidos
