Elorda ımamdarynyń III aımaqtyq forýmy ótti (FOTO+VIDEO)
Búgin Elorda tórinde QMDB Nur-Sultan qalasy ókildiginiń uıymdastyrýymen «Rýhanı qundylyqtar – qoǵam birliginiń negizi» atty III aımaqtyq ımamdar forýmy bolyp ótti. Alqaly jıynǵa QMDB tóraǵasy, Bas múftı Serikbaı qajy Oraz jáne bólim meńgerýshileri, Nur-Sultan qalasynyń dinı qyzmetkerleri men zııaly qaýym ókilderi qatysty. Qasıetti Quran aıattarymen bastalǵan forým jumysyna QMDB tóraǵasynyń birinshi orynbasary, naıb múftı, Nur-Sultan qalasynyń bas ımamy Naýryzbaı qajy Taǵanuly moderatorlyq etip, búgingi basqosýdyń mańyzdylyǵyn atap ótti.
El birligin kózdegen keleli jıynǵa memleket jáne qoǵam qaıratkeri Myrzataı Joldasbekov, Qoǵamdyq damý isteri basqarmasynyń basshysy Rahmanberdi Talǵat Abaıuly, akademık Dıhan Qamzabek, belgili jýrnalıst, qoǵam qaıratkeri Jabal Erǵalı, Memleket tarıhy ınstıtýtynyń bólim basshysy Jabaı Qalıevter arnaıy shaqyrylyp, súbeli baıandamalar jasady. III Respýblıkalyq Imamdar forýmynda qabyldanǵan Qazaqstan musylmandarynyń tuǵyrnamasy «Jeti rýhanı qazyq» qujatyndaǵy asyl qasıetter aıtylyp, urpaq tárbıesi men ult bolashaǵyna tıgizer izgi úlesi jaıynda keńinen qozǵaldy. Osy baǵyttaǵy saýapty isterdiń jarshysy bolýǵa shaqyryp, el aǵalary Elorda ımamdaryna óz senimderin bildirip, amanat júktedi.
Alqaly jıyn aıasynda III Respýblıkalyq ımamdar forýmynda qabyldanǵan qos qujat jaıynda da arnaıy baıandamalar jasalyp, Elorda ımamdarynyń biliktiligin arttyra tústi. QMDB Sharıǵat jáne pátýa bóliminiń meńgerýshisi Sansyzbaı Qurbanuly men Dinı bilim jáne dinı kadrlar daıarlaý bóliminiń meńgerýshisi Beıbit Myrzageldıevter «Dinı rásimder tizilimi» jáne «Dinı laýazymdar tizilimi» qujattaryn tanystyryp, forým qatysýshylaryna tolyqtaı málimet berdi.
Forým sońynda arnaıy Úndeýi qabyldanyp, QMDB Apparat jetekshisi Ǵylymbek Jádigeruly qatysýshylarǵa izgilikke úndegen úndeý mátinin oqyp berdi.
Sýretterdi «FOTOGALEREIa» aıdarynan kóre alasyzdar!
