Elorda meshitterinde oraza aıt merekesi keńinen atalyp ótti

Búgin elorda meshitterinde Oraza aıt namazy oqylyp, jamaǵat ulyq meıramnyń shattyǵyn birge bólisti. Qazaqstan musylmandary dinı basqarmasy Astana qalasy ókildigine qarasty barlyq meshitterde tańsáriden jınalǵan musylman qaýymy qasıetti kúnniń berekesin sezindi.

Aıt namazyna qatysqan jurtshylyq duǵa jasap, bir-birine aqjarma tilekterin arnady. Imamdar Oraza aıttyń rýhanı mańyzyna toqtalyp, jamaǵatty izgilikke, janashyrlyq pen baýyrmaldyqqa shaqyrdy.

Ulttyq qundylyqtardy dáripteý maqsatynda meshit aýlalarynda kıiz úıler tigilip, kelgen qonaqtarǵa dástúrli taǵamdar usynyldy. Sonymen qatar, asyq atý, qol kúres, arqan tartý jáne kir (gır) kóterý sekildi ulttyq oıyndar uıymdastyrylyp, merekeniń ajaryn asha tústi.

Aıt merekesi aıasynda balalarǵa syılyqtar úlestirilip, búldirshinderdiń júzin shattyqqa bóledi. Sondaı-aq, áleýmettik qoldaýǵa muqtaj otbasylarǵa qaıyrymdylyq kómek kórsetildi.

Aıta keteıik, Oraza aıt – musylman qaýymy úshin erekshe mánge ıe ulyq meıram. Bul kúni adamdar bir-birine keshirimmen qarap, tatýlyqty nyǵaıtyp, qýanyshty ortaqtasady.