Elorda meshitterinde qyzmettik aýys-túıis oryn aldy (FOTO)

Búgin, qasıetti juma kúni QMDB tóraǵasy, Bas múftı Serikbaı qajy Orazdyń buıryǵymen Elordamyzdaǵy «Aqmeshit» jáne «Ǵylmanı» meshitterinde qyzmettik taǵaıyndaýlar oryn aldy. Juma namazyna jıylǵan jamaǵatqa jańa qyzmetkerler tanystyrylyp, jumystaryna sáttilik aıtyldy.

Jamaǵatqa jaqynda ǵana esigin aıqara ashqan «Aqmeshit» meshitiniń naıb ımamy Qanat Alshynbaev «Ǵylmanı» meshitiniń naıb ımamy qyzmetine aýystyryldy. Meshit jamaǵatyna «Otandy súıý – ımannan» taqyrybynda juma ýaǵyzyn júrgizgen QMDB Sharıǵat jáne pátýa bólimi meńgerýshisiniń orynbasary belgili ıslamtanýshy Hasan Amanqulov jańa qyzmetkerdi tanystyryp ótip, Bas múftı buıryǵyn jetkizdi.

Al, uzaq jyldar boıy «Ǵylmanı» meshitinde naıb ımamdyq qyzmet atqaryp kelgen Shamshıden Nursultan «Aqmeshit» meshitine qyzmetke aýysty. Nur-Sultan ókildigi atynan arnaıy barǵan «Áziret Sultan» meshitiniń naıb ımamy Qýat Erǵalıuly jamaǵatty Bas múftı buıryǵymen tanystyryp, din jolyndaǵy qyzmetine sáttilik tiledi.