Elordada áıel ustazdardyń Respýblıkalyq konferentsııasy ótti (FOTO)

Elordada QMDB Áıel-qyzdar sektorynyń uıymdastyrýymen «Urpaq tárbıesi – ult taǵdyry» atty áıel ustazdardyń respýblıkalyq konferentsııasy ótti.

Respýblıkalyq «Áziret Sultan» meshitinde ótken alqaly jıynǵa Bas múftı Naýryzbaı qajy Taǵanuly, belgili qoǵam qaıratkerleri jáne QMDB ókildikterindegi Áıel-qyzdar sektorynyń meńgerýshileri men áıel ustazdar qatysty. Jıyndy Áıel-qyzdar sektorynyń Nur-Sultan qalalyq ókildiginiń meńgerýshisi, «Áziret Sultan» meshitiniń ustazy Dınara Qutqojaqyzy júrgizdi.

Memleket basshysy jarııalanǵan «Balalar jyly» aıasynda uıymdastyrylyp otyrǵan Respýblıkalyq konferentsııa tuńǵysh ret elimizdiń barlyq ókildikterindegi áıel ustazdardyń basyn qosyp, bala tárbıesi jóninde ózara tájirıbe almasýyna jol ashty. Qasıetti Quran aıattary oqylyp, batamen bastalǵan berekeli basqosýǵa arnaıy qatysqan Bas múftı Naýryzbaı qajy Taǵanuly da konferentsııa jumysyn aıryqsha atap ótip, bala tárbıesindegi ana róliniń mańyzdylyǵyna toqtaldy. Osy baǵytta meshitterde jemisti eńbek etip, áıel jamaǵatyn ımandylyqqa tárbıelep kele jatqan ustazdarǵa óz alǵysyn bildirdi.

Respýblıkalyq konferentsııa otyrysyna elimizge belgili qoǵam qaıratkeri Orazkúl Asanǵazy, Nur-Sultan qalasy ákimdiginiń Tehnologııalyq kolledjiniń dırektory, Máslıhat depýtaty Lázzat Muratqyzy qatysyp, «Bala tárbıesindegi ákeniń orny» jáne «Alyp anadan týady» taqyryptarynda súbeli baıandama jasady.

Áıel ustazdardyń ózara tájirıbe almasyp, respýblıkalyq deńgeıdegi jumystar boıynsha ortaq qorytýyna baǵyttalǵan konferentsııa aıasynda Almaty qalasynan Gúlmıra Ilesbekqyzy, Qarlyǵash Qajymálikqyzy (Pavlodar ókildigi), Kenjegúl Qurmanǵalıqyzy (Aqtóbe), Danagúl Tólegenqyzy (Semeı aımaǵy), «Áziret Sultan» meshitiniń ustazy Elmıra Buharbaevalar bala tárbıesine qatysty túrli taqyrypta baıandama jasady.

Shara sońynda Respýblıkalyq konferentsııa qatysýshylaryna arnaıy estelik syılyqtar tartý etildi.